Arbeidstilsynet har mistanke om asbest i fleire bygningskonstruksjonar ved Ålesund brannstasjon på Volsdalsberga.
Mistanken kom under eit tilsyn onsdag 29. oktober.
Nye prøver
Allereie dagen etter har firmaet Polygon vore inne og teke prøver som no er sendt til vidare analyse.
Svar på prøvene er venta å ligge føre måndag 3. november.
- Vi håpar at det ikkje er funne asbest, men mistanken gjer at vi er "føre var", seier brannsjef Geir Thorsen til smp.no.
Stengd gymsal
I eit brev til styret i Ålesund brannvesen KF skriv brannsjefen at han og hovedverneombod Bernt Olaf Slyngstad har stengt gymsalen på brannstasjonen med umiddelbar verknad.
Det er også lagt ned fleire restriksjonar på bruken av vognhallen fram til resultat av prøvene er kjend.
Også rådmann og ordførar er orientert om situasjonen.
Bygd i 1978
Brannstasjonen blei teken i bruk i 1978. Og det er fleire gonger utrykt uro for kummerlege forhold. Seinast i april i år gjekk tilsette ut og åtvara mot helseskadelege forhold.
I fleire år har det vore planar og ønske om ny brannstasjon i Ålesund, utan at politikarane hittil har funne pengar til prosjektet.
Forbod i 1977
Restriksjonane som no er innført ved brannstasjonen vil gjelde til resultatet av prøvene ligg føre. Thorsen håpar at prøvane vil vise at det ikkje er asbest i konstruksjonen.
- Forbodet mot asbest kom i 1977, og sidan brannstasjonen blei teken i bruk i 1978, har vi levd i den tru at det ikkje fanst asbest i bygningskonstruksjonen, seier han.
Ifølgje Thorsen har Arbeidstilsynet ein landsdekkande kampanje med tilsyn ved brannstasjonar i fohold til kreftfare.