Per Bjørn Ellingseter er tildelt Kongens fortjenstmedalje, melder Vestnes kommune på heimesidene sine onsdag.
- Ellingseter har gjennom ei lang yrkeskarriere og eit aktivt liv sett sitt preg på samfunnet rundt seg, heiter det kort om bakgrunnen. Grunngjevinga for tildelinga blir elles gjort kjend under ei kombinert markering og overrekking for inviterte gjestar, på Vestnes Fjordhotell 24. oktober.
Per Bjørn Ellingseter (f. 1943) er fødd i Fiksdal, men bur på Vestnes. Han er utdanna lærar og har i tillegg mellom anna også vore inspektør og rektor i Vestnes kommune. Ellingseter har i mange år vore leiar for Vestnes Sogelag, har skrive fleire lokalhistoriske bøker og vore aktiv innan idrett og musikkliv. Han har også skrive teatermanus og vore i sving som foredragshaldar.