– Alt er klart for nok ein fantastisk skifest. Vêrmeldingane er gode, og fjellet er fullt av snø, fortel ein entusiastisk Leidulf Årvik, leiar for Alperittet på Stranda.

Rennet finn stad laurdag 24. februar.

Løypa er på heile 6200 meter, går frå fjellet Roaldshorn, 1230 meter over havet, ned snaufjellet, gjennom ein krevjande skogstrasé. Vidare over dyrka mark, ned gangvegen langs Storgata og endar utanfor det gamle rådhuset, det som no er døypt Skinkerådhuset.

– Kven snakkar om snøen som fall i fjor. No melder skisenteret på Strandafjellet at det er ein meter og sytti med snø der oppe. Vi har dessutan samla oss fleire snødepot, så vi skal ha nok å ta av når vi fredag startar arbeidet med å legge snø nedover gangvegar og fortau heilt ned til sentrum, legg Årvik til.

Ulike klassar

Under Alperittet blir det heile 26 klassar, der ein kan delta både på snowboard, telemarkski og alpinski. Ja, som tidlegare år så er dette også ein del av norgescupen i telemark, og fleire av landets beste utøvarar er påmelde.

– Dessutan blir det Minialperitt for borna, karnevalsopptog, Strandabord på kulturhuset og musikk på hotellet.

– Ute i gatene skal det bli liv og røre, der folk kan følgje med på rennet via ein storskjerm, fortel Leidulf Årvik.

– Kor mange deltek i år?

– Tysdag hadde vi passert hundre påmelde. Vi reknar med å ha kome opp i 250 når det heile tek til laurdag.

Årvik seier at det er påmelde frå Honningsvåg i nord til Kristiansand i sør. Nokre svenskar har også meldt sin ankomst.

Alperittet har vore arrangert sidan 1995. Løyperekorden er frå 2008. Det året brukte Nils Bjarne Krohn frå Åndalsnes IF berre seks minutt og 15 sekund på turen ned frå Roalden.

Fort opp

Men kor raskt kan ein kome seg opp på fjellet? Arrangøren har utfordra sprekingen Kjell Magnar Berli til å prøve å greie turen til topps med randoneski på ein time.

– Er det nokon som klarer det, så er det Kjell Magnar. Han er knallgod på ski, likar å gå fort, og han likar å gå i motbakkar, seier Leidulf Årvik.

– Eg trur eg skal klare det på ein time. Eg føler meg i god form, svarer Kjell Magnar Berli.