Etter over 40 år har gründer og noverande dagleg leiar Jarle Støylen bede om avløysing.

– Det er derfor ei stor glede for styret å melde at Håvard Haanes har tatt imot stillinga som ny dagleg leiar i Brimer AS. Håvard har ein spennande CV, og har lang og god erfaring frå diverse stillingar i lokalt næringsliv, sist som adm.dir. i Tingstad AS, uttaler selskapet i ei pressemelding.

Brimer/Kvamsøy Plastindustri produserer tankar, vassbasseng og siloer av glasfiberarmert plast. Bedrifta har rundt 50 tilsette.

Stadt og Rolls-Royce

Haanes er utdanna sivilingeniør frå NTH og har mellom anna erfaringar som dagleg leiar i Stadt Automasjon AS og seinare i Odim ASA. Der var han med på oppkjøpet og fusjonen inn i Rolls-Royce Marine. Her jobba han tre år som leiar for Deck Macinery Seismic & Subsea.

Den siste tida har han jobba som sjølvstendig rådgjevar og styremedlem/-leiar i diverse selskap innan maritim næring.

Sterk vekst

– Brimer AS er p.t. inne i ei sterk og positiv utvikling. I mai 2015 fekk selskapet inn Midvest Fondene og Spilka International AS som nye aksjonærar/medeigarar, og føretaket satsar på å vekse vidare innan sine hovedsatsingsområde. Det er derfor gledeleg å kunne melde at vi no har fått ein ny toppleiar som har kunnskap om og erfaring frå bedrifter som har gjennomgått sterk vekst og utvikling tidlegare, heiter det vidare i pressemeldinga.

Håvard Haanes startar opp i Brimer AS for fullt ca. 1. april 2016. Fram til dette styrer Jarle Støylen føretaket vidare etter den vekstplanen som styret har vedtatt. Støylen vil deretter halde fram som styremedlem, og i ei anna stilling i selskapet.