Totalverdien på kontraktane er på om lag 15 millionar kroner, ifølgje ei pressemelding.

Kontraktane er inngått med Kleven og med MAN Diesel & Turbo.

Danske trålarar

Scana Propulsion, som held til i Volda, og MAN Diesel & Turbo SE har inngått avtale om leveranse av framdriftsanlegg for to nye trålarar som skal kontraherast ved Karstensens Skibsværft A/S.

Scana Propulsion skal levere gir, propellar og fjernstyringssystem. Begge utstyrspakkane skal leverast frå fabrikken i Norge i løpet av tredje kvartal 2017.

Kleven verft

Den andre kontrakten er inngått med Kleven Verft. Her skal Scana Volda levere gir, propell og fjernstyringssystem til DESS Aquaculture Shipping sine nye FHV-skip. Leveransane vil skje i andre kvartal i 2017.

- Vi er stolte av å bli valde til å levere utstyr til endå fleire fartøy innanfor fiskeri og havbruksnæringa og takkar for tilliten kundane våre har vist oss, seier Hallvard Pettersen, dagleg leiar i Scana Volda AS.

Stram marknad

Pettersen fortel at Scana Propulsion har fått fleire viktige kontraktar på leveransar til fiskefartøy siste tida, noko han meiner stadfestar den sterke posisjonen selskapet har i dette segmentet.

- Aktiviteten ved Scana Propulsion er delt mellom nysalg og service/ettermarknad. I ein stram marknad er det hard konkurranse blant marknadsleiande aktørar, og det å vinne kontraktar på så vel nybyggingsprosjekt som retrofit den siste tida, er ei stadfesting på Scana Propulsion si konkurranseevne, avsluttar Pettersen.