Garaventa sin totale aksjekapital i Hoven Loen AS vart dermed auka til 29 millionar kroner, som utgjer ca 20 prosent eigardel.
– Vi har vore partnerar og medaksjonærar sidan starten av. Etter kvart som prosjektet har gått framover og vi ser kor stort dette er og seriøsiteten både i selskapet og prosjektet, ønskjer vi å auke eigarskapen vår til om lag 20 prosent, sa Sebi Lüönd, økonomidirektør i Garaventa AG før han signerte nyteikninga av aksjar. Og det til stor applaus frå generalforsamlinga.
– Med nyteikninga av aksjar er Hoven Loen Garaventa sitt fjerde største investeringsprosjekt i verda, etter Antalia i Tyrkia, Koblenz i Tyskland og Lisboa i Portugal. Vi ser oss alltid rundt etter slike gode prosjekt som Hoven Loen, seier Lüönd til Fjordingen.
Applauderte
Hovenbana i Loen vart dyrare
Generalforsamlinga gjorde samtidig vedtak om å auke maksimal aksjekapital til 145 millionar kroner. Det betyr at dei øvrige aksjonærane kan teikne seg for til saman nye 11-12 millionar kroner i tida som kjem.
Selskapet som først var planlagt til 202,5 millionar kroner, er no oppe i 267,5 millionar kroner, og prosjektet er fullfinansiert.
Dagleg leiar Richard Grov tok i møtet sjølvkritikk på at han ikkje tok høgde for høgare pris enn 202,5 millionar frå starten av, utan at han blei møtt med anna enn smil.
– Garaventa har heile tida sagt at vi må gjere ting skikkeleg og ferdig. Det har vi gjort. Pendelbana er i drift og går opp og ned før byggjelånet vert opna. Smak på den, sa Grov.
Prøvekaninar
Kabelvognene på plass i gondolbana Hoven Loen
Styret fekk tidlegare måndag vere "prøvekaninar" opp gondolbana, etter spesialtillatelse frå utbyggjaren. Styreleiar Leif Riksheim gjorde det klart at framtidige brukarar av bana har mykje å glede seg til.
Opninga av Hoven Loen er sett til 20. mai 2017.
Etter generalforsamlinga fortalde byggjeleiar Ragnar Hagen om kompleksiteten både med å planleggje, skrive kontrakt og gjennomføre prosjektet.
– Utan tilsvarande prosjekt hadde vi ikkje grunnlag for å hente anbod. Vi endte opp med spesialavtale med HS Bygg som hovudentreprenør. Og eg kan gje stor ros til HS Bygg, for prosjektet har ikkje kosta ei krone ekstra i feil frå HS Bygg, sa Hagen. Når han la til at maks feilmargin mellom botn og topp i prosjektet skulle vere fem millimeter, vanka det ny applaus frå generalforsamlinga. HS Bygg leverte innafor høvesvis ein og to millimeter.
Prosjektet er så langt gjennomført utan ulukker med personskade.