Det fryktar fylkesrådmann Ottar Brage Guttelvik vert konsekvensen dersom forskrifta om fordeling og avgrensing av produksjonskapasitet i lakseoppdrettsnæringa vert oppheva, slik Nærings- og fiskeridepartementet (NFD) foreslår.
Forslaget er sendt ut på høyring, og kjem som sak til regional- og næringsutvalet måndag 20. oktober og går vidare til fylkesutvalet.Fylkesrådmannen meiner ein må verne om lokalt eigarskap av naturressursane våre og lokal verdiskaping.
Nøkkelfaktor
Det vert understreka at tilbakeføring av verdiar til samfunn som stiller fellesskapet sine areal i kystsona til disposisjon for havbruk, er ein nøkkelfaktor for å vidareutvikle havbruksnæringa til ei av dei viktigaste næringane i Norge.
Havbruksnæringa er heilt avhengig av gode areal for å drive berekraftig. Det kan bli vanskeleg å få innpass i kommunane til gode havbruksareal dersom lokalsamfunnet får lite igjen for havbruk.
Treng areal
Det vert mint om at tilgang på areal er ein «mangelfaktor», og at havbruksnæringa treng areal for å vekse.
Mange kommunar er tilbakehaldne med å leggje til rette for akvakulturverksemd då dei meiner næringa gir for lite tilbake.
Samfunnsansvar
Slik fylkesrådmannen ser det, inneber forslaget frå departementet at store selskap får høve til ytterlegare vekst gjennom oppkjøp i næringa, utan at dei vert pålagt eit større samfunnsansvar.
Den forskrifta som departementet ynskjer å oppheve, var meint å skulle bidra til ei rimeleg fordeling av godane ved å bruke fellesskapets areal i norske kystkommunar.
Må søkje
Dersom nokon ynskjer å eige meier enn 15 prosent av havbruksnæringa, må dei i dag søkje om løyve til dette og vert då underlagt fleire krav, mellom anna bearbeidingsgrad og tilbod om lærling- eller traineeplassar.
Departementet på si side kan ikkje sjå særtrekk ved havbruksnæringa som gjer det nødvendig å halde oppe eigne reguleringar om eigarskap og produksjonskapasitet.
Gjer det vanskeleg
Dei meiner dagens regelverk grip inn i organiseringa av næringa, og gjer det vanskeleg å oppnå ein mest mogleg effektiv struktur. Styresmaktene bør ikkje fastsetje krav som vert opplevd som eit hinder for ei tilpassing til den globale marknaden, men heller ta vare på omsynet til oppdrettsselskapa sin fleksibiletet og tilpassingsevne.
Gjennom ei forenkling av regelverket vil ein lette oppgåver til både næring og forvaltning, går det fram av forslaget frå Nærings- og fiskeridepartementet (NFD).
Dominert
Møre og Romsdal er dominert av havbruksselskap med adresse i andre fylke.
Fylkesrådmannen minner om at fylket allereie er hardt pressa på sentraliseringsutfordringar, og han fryktar at ei oppheving av forskrifta kan skape endå meir sentralisering. Det kan heller ikkje utelukkast at bearbeiding og vidareforedling vert flytta ut av landet i større grad.