Den maritime klynga i Møre og Romsdal er, saman med olje- og gassklynga Node i Agder, Norges to første næringsklyngjer på internasjonalt toppnivå.

Den maritime klynga i Møre og Romsdal - NCE Maritime - skal no heite GCE Blue Maritime. GCE står for Global Centres of Expertise.

Per Erik Dalen, dagleg leiar i NCE Maritime, næringsminister Monica Mæland og Anne Grete Ellingsen, leiar for NODE i Agder.

Næringsminister Monica Mæland offentleggjorde nyheita onsdag føremiddag. For regjeringa er den auka satsinga på klyngeprogrammet ein viktig del av innovasjons- og næringspolitikken.

Aukar trykket

Den maritime klynga på Møre var den første som i 2006 fekk status som Norwegian Centre of Expertise (NCE).

NCE Maritime har dermed fått tilgang på ekspertise, og på fleire titals millionar kroner, til å forbetre samhandlinga mellom dei 220 bedriftene i klynga.

Ved at regjeringa innfører ein ny toppdivisjon, Global Centres of Expertise, blir trykket auka enno meir. Dette handlar både om status og om pengar.

Per Erik Dalen er adm.dir i NCE Maritime.

– Dette gir oss mulegheita til å utvikle klynga si globale konkurransekraft, seier Per Erik Dalen, dagleg leiar i det som no er GCE Blue Maritime.

Sjå også: Slik var Norges-kartet for NCE fram til i dag (nce.no)

Anerkjenning

– Tildelinga er ei anerkjenning til dei innovative maritime bedriftene som kvar dag skaper store verdiar for Norge, seier Dalen.

– Statusen gir merksemd, det er viktig i seg sjølv. I tillegg handler dette om fellestiltak som rekruttering, utdanning, forsking og internasjonalisering, seier han.

Ikkje minst i Asia er det konkurrerande maritime klynger.

Alle nasjonar har innsett at gode næringsklynger skaper størst verdiar. Det er fleire konkurrerande klynger ute som truar vår posisjon. Asia er sjølvsagt aktiv. Det som er viktig er at vår region må vere attraktiv, seier Dalen.

Komplett

Den maritime klynga i Møre og Romsdal består av 220 bedrifter. Regiondirektør Hollingsæter i Innovasjon Norge seier klynga i stor grad er komplett.

– I Norge er det ingen andre så komplette klynger. Dessutan har den vist at den er ekstremt dynamisk, den ser mulegheiter og er rask til å omstille seg. No vil vi løfte den enno meir, for å gjere den mindre sårbar for utviklinga innan olje- og gassbransjen. Alle som er veldig gode kan bli enno betre. Utfordringane framover er kanskje fallande oljepris og press i retning av å kutte kostnader, seier direktør Bodil Palma Hollingsæter i Innovasjon Norge Møre og Romsdal.

Ubrukte mulegheiter

Næringsklyga har i dag ein offshore-simulator på Norsk Maritimt Kompetansesenter i Ålesund, og får snart ein simulator i Fosnavåg.

Her er det ubrukte mulegheiter.

ARKIV. Offshoresimulatoren ved Norsk Maritimt Kompetansesenter i Ålesund. HKH Kronprins Haakon ved spakane i simulatoren saman med kaptein Jeff Knight frå Farstad shipping (t.v) og Arne Monsholm. Foto: Staale Wattø

– Simulator, som i dag blir brukt til opplæring, kan også brukast til å utvikle prototypar innan det maritime. Det er nyttig når olje og gass skal utvinnast på store djup, seier Hollingsæter.

GCE Blue Maritime vil også satse på heilt nye område, ikkje berre på olje og gass. For i havet finst det nye mulegheiter til å dyrke mat, utvinne energi og også å utvinne metall.

– Verda har befolkingsvekst og treng mat, energi og mineral som er i havrommet. Mulegheitene havet gir er mange, seier adm.dir Per Erik Dalen i GCE Blue Maritime, til Smp.no.

Denne klynga er verdsleiande, og den har bestått i mange år. Er det nokon som skal leie vegen ned i havrommet, så er det denne klynga, seier Hollingsæter i Innovasjon Norge.

Definerte satsingsområde i GCE Blue Maritime er:

  • Avanserte subseaoperasjonar

  • Klima, miljø og HMS

  • Globale kunnskapskoplingar

  • Havrommets mulegheiter (som biomarine næringar, mineralutvinning og fornybar energi)

  • Virtuelle prototypar og simulering

  • Prosessinnovasjonar og insourcing