Endret: 21.02.2011 kl. 08:50
– Eg trur havbruksnæringa står ved eit vegskilje, seier Kenneth Brandal, nytilsett administrerande direktør i Onshore Fish Tec AS på Fiskå.
Oppdrettsveteranen med fortid i Pan Fish og Atlantic Cod Farms har tilhøyrt skeptikarane, men no framstår han som nyfrelst tilhengar av oppdrett på land.
Onshore Fish Tec har jobba i det stille med å utvikle eit landanlegg i samarbeid med mellom andre Plany i Gursken, Brimer på Kvamsøy og Global Enviro i Selje. Basert på ein teknologi for resirkulering av vatn, utvikla på Færøyane, har det vore testproduksjon ved Fjord Gadus sitt torskeanlegg på Sigdal ved Fiskå.
– Vi kan dokumentere at det er billegare å opprette laks og torsk på land til fisken er eit kilo, seier Frode Sørdal, dagleg leiar ved Fjord Gadus og ein sentral person i prosjektet.
Halvegs
Allereie dette resultatet opnar opp nye perspektiv for norsk havbruk, som har slite med sjukdom og miljøproblem. Dersom ein ventar til fisken er eitt kilo med å setje han i sjøen er sjøperioden korta ned med fem-seks månader. Det er nesten halve levetida for ein oppdrettslaks
– Oppdrett på land betyr at ein har kontroll med alle miljøfaktorar og problem med sjukdom og lakselus kan minimaliserast. Ein vert kvitt veldig mange av plagene som næringa slit med, seier Frode Sørdal.
Ved å produsere stor fisk på land før han vert utsett kan ein og ta i bruk havlokalitetar, og forandre drifta på fleire måtar.
– Vi kan ha fisken i ei og same merd i sjøen til han er slakteklar. Då slepp ein å flytte fisken, noko som ofte er risikabelt. Det gjer det også lettare å tilpasse seg nye krav om periodevis brakklegging, seier Kenneth Brandal.
Og dette er berre starten.
– Vi har produsert firekilos laks i anlegget. Så det er fullt mogleg å ale fram slakteferdig fisk på land i stor skala på ein økonomisk måte, seier Frode Sørdal, som framhevar at dei har leita etter praktiske og effektive løysingar. – Dette er utvikla av oppdrettarar, ikkje akademikarar, seier Sørdal.
Ei ny tid
Å få lønsemd i landbasert oppdrett har lenge blitt avvist som lite realistisk, men Onshore Fish Tec er eit av fleire døme på at det kjem nye teknologiske løysingar. Men sjølv om dei kan konkurrere med sjøbasert oppdrett når det gjeld driftsøkonomi, så krev landbaserte løysingar større grunnlagsinvesteringar enn oppdrett i sjø.
– På eit eller anna tidspunkt må oppdrettarane spørje seg om kva som løner seg på lang sikt. Eg meiner svaret er meir landbasert oppdrett, og det trur eg dei seriøse aktørane vil sjå. Dette er framtida, seier Kenneth Brandal.
