Råkøyrde forbi fartsmålarar på E6

Mannen som er busett i Stryn må no sone 19 dagar i fengsel, for råkøyringa i Hedmark ein fredag kveld i juli.

Ifølgje dommen frå Fjordane tingrett blei mannen teken i ei gjennomsnittsmåling over 5,3 kilometer på E6 ved Tangen i Stange kommune.

Var åleine i bilen

Målinga viser at mannen køyrde i 181 km/t, på strekninga der det er 110-sone. Ifølgje dommen var det lyst og lite trafikk. Sjåføren var også åleine i bilen.

Fjordane tingrett har i straffeutmålinga lagt vekt på at mannen heldt svært høg fart på ei lengre strekning.

I formildande retning har retten lagt vekt på at mannen har tilstått.

Mister førarkortet

I tilegg til fengselsstraff må mannen klare seg utan førarkort.

Han er frådømd førarkortet i 16 månader og må ta full ny førarprøve for å få lov til å køyre bil igjen.