Det meiner advokat Leif Kahrs Jæger frå Bergen, som nyleg kjøpte den tidlegare sorenskrivargarden Leikvin ved Nordfjordeid for tre millionar kroner via tvangssal.
Refugium tyder i dette tilfellet ein tilfluktsstad – ein stad der ein kan søkje kvile, andeleg inspirasjon eller arbeidsro.
Overnatting
– Min plan for Leikvin er å lage ein overnattingsstad der det kan haldast seminar og kurs, arrangerast lokale dagar, og der det også er mogleg med rimelegare langtidsleige for kunstnarar eller andre som treng arbeidsro, seier Jæger.
Advokaten har i 30 år vore aktiv i Fortidsminneforeningen, og fortel at han har lagt sin elsk på kulturminne. Han har m.a. kjøpt og sett i stand fleire verneverdige hus på Sørlandet.
Ifølgje den nye eigaren av Leikvin, er sorenskrivargarden i bra stand etter tidlegare eigar sin innsats. Jæger legg opp til å få til åtte-ti soverom i det 600 kvm store huset, og ser føre seg nokre nye bad og å ruste opp kjøkenet. Endringar som dette krev godkjenning frå Riksantikvaren, men direktoratet er normalt positivt til slik vern gjennom bruk.
Kulturminne
– Mange stader i Norge blir kulturminne ofte tekne for gitt, og for meg er det viktig å gjere ein innsats for å bevare eigedomar som har verdi for oppleving av identiteten vår. Håpet er at lokalbefolkninga ser verdien i at Leikvin vert teken vare på og opna for ålmenta. Eg håper også å kunne by på utstillingar og konsertopplevingar i huset, seier Jæger.