Vogntog prøvde seg i Trollstigen

Ved 15-tida fekk vogntoget hjelp av Mesta opp Trollstigen gjennom ein del verkeleg skarpe svingar.

- Samtidig stod politiet nedst i Trollstigen og stansa all trafikk som skulle opp, seier operasjonsleiar Sigvart Sivertsen ved politiet i Nordmøre og Romsdal.

Vogntoget stod fast

- Vogntoget hadde rota seg såpass godt oppi der at det var umuleg å få det til å snu, så det blir geleida vidare oppover, fortalde Sivertsen tidlegare torsdag ettermiddag.

Makslengde for køyretøy i Trollstigen er 13,1 meter, og det er skilta med forbodsskilt. Vogntoget var rundt tre meter lengre. Politiet opplyser at vogntoget er registrert i Estland.

For langt køyretøy

Meldingar som politiet og vegtrafikksentralen har fått går ut på at minst eitt køyretøy lengre enn maksgrensa har prøvd seg i Trollstigen i dag. Også bubilar skal ha laga krøll i trafikken i dag.

Politet vil forsøke å gje sjåføren av vogntoget ei bot.

- Vi vurderer ein straffereaksjon. Det er muleg å gje eit førelegg, eg trur det er 4.200 kroner, seier Sivertsen.

For ei veke sidan var det trafikkproblem i Trollstigen etter at ein buss stod fast.