Men det er fleire som dreg til den svenske hovudstaden den aktuelle veka i februar, mellom andre sykkylvsbedriftene Brunstad og LK Hjelle. Begge har nemleg funne ein vri:
– Vi prøvde å få oss betre plassering på Stockholmsmessa, men vann ikkje fram. Som ein liten protest har vi i staden leigd oss eit showrom i Stockholm sentrum denne veka, der vi viser fram møblar. Det seier marknadssjef Karl Inge Hole i Brunstad AS.
LK Hjelle
Dagleg leiar Dag Hjelle hos LK Hjelle skal også til Stockholm:
– Vi stiller mellom anna ut ein helt ny sofa, og det skjer i den norske ambassaden i Stockholm, seier Hjelle.
Under Stockholm Furniture & Light Fair i februar er nemleg eit utval av norske designarar, produsentar og kunsthandverkarar inviterte til å stille ut sine arbeid ved den norske ambassaden. LK Hjelle er ein av dei.
– At vi ikkje stiller ut på sjølve møbelmessa skuldast mellom anna at vi rett og slett har hatt det så travelt i det siste. Vi har bra auke i møbelsalet, ikkje minst til utlandet. Eksporten nærmar seg no 50 prosent. Og vi har tilsett 11 nye i året som gjekk, legg Dag Hjelle til.
Dei var heller ikkje på messa i fjor, men Hjelle ser ikkje vekk ifrå at dei kan kome tilbake igjen ved eit seinare høve.
Fora Form
Ein som derimot er klar for Stockholmsmessa er salssjef Frode Sporsheim i Ørsta-bedrifta Fora Form. Dei blir ca. 20 personar i den svenske hovudstaden i løpet av messeveka.
– Vi har fått 125 kvadratmeter til rådvelde, og skal her mellom anna vise tre heilt nye produkt, fortel Sporsheim.
– Så messa er viktig, meiner du?
– Ja, dette er den viktigaste marknadsplassen for Fora Form ettersom vi satsar på å auke eksportdelen vår. På messa i Stockholm kan vi vere synlege for heile Skandinavia. Vi har delteke på messa dei ti siste åra. Å la vere har ikkje vore noko tema.
– Men det er ikkje billig?
– Nei, det er det slett ikkje. Men nokre stader må vi satse. Ein kan ikkje risikere å spare seg til fant, heller. Vi må ut for å treffe forhandlarar ansikt til ansikt. Det er den måten vi sel møblar på, meiner salssjef Frode Sporsheim i Fora Form.
Hovden Møbel
Også Hovden Møbel i Ørsta er tilbake på Stockholmsmessa i år, etter eit opphald i fjor.
– Vi har ein del nyheiter som vi vil å vise fram. Det gjeld både sofa og sovesofa, seier dagleg leiar Lisbeth Hovden Nilsen.
Hovden har flytta produksjonen til utlandet, men har framleis hovudkontoret i Ørsta.
– Vi ser verdien av å vere i Stockholm, ikkje minst for å treffe svenske og norske kundar i kontraktsmarknaden.
Andre utstillarar frå Nordvestlandet i år er:
Helland Møbler, Stordal, Vad, Stordal, Kvadrat/Innvik, Stryn, Glamox, Molde, Fjordfiesta, Molde – og designaren Peter Opsvik, opphavleg frå Stranda.
Ekornes stiller aldri ut på messa. Dei har sitt eige opplegg på Brunholmen i Ålesund.