– Vi kjenner oss lurt, ja, fullstendig ført bak lyset. Hadde vi sett for oss at dette kunne bli resultatet, er det vel ikkje sikkert vi hadde stemt som vi gjorde med tanke på kommunesamanslåing, seier midsundordførar Odd Helge Gangstad (Sp) til rbnett.no.
Midsund har vedteke samanslåing med Molde og Nesset. Nyleg fekk han vite at kommunen likevel blir trekt i det såkalla basistilskotet.
– Premisset var at gjorde du vedtak innan fristen, var det inga avkorting i 15 år, og nedtrapping i fem år, seier Gangstad til smp.no.
Han fortel at han har fått ein litt uggen følelse for heile kommunesamanslåinga.
Ordføraren håper feilen kan bli retta opp i revidert nasjonalbudsjett i mai.
Ingen planar om å trekke seg
– Kan det tenkast at Midsund kommune snur og trekker seg ut igjen av ein storkommune med Molde?
– Så krevjande prosessar som kommunesamanslåingar er, så kan vi ikkje justere grensene heile tida. Det er heilt avgjerande at kommunane som er i prosess leverer gode tjenester, det kan være ei utfordring om ein vinglar hit og dit, seier Midsund-ordføraren.
– I alle samtalar med Molde og Nesset har det også vore ein flott tone, seier Gangstad, men brukar likevel uttrykk som at «kjøtvekta dreg» og at det alltid er ein viss fare for «kolonialisme» når den nye kommunen skal byrje å fungere.
Han legg til at Senterpartiet si haldning til kommunereforma er klar: Frivillige prosessar utan bruk av tvang.
– Eg vil minne om at i åtte av dei ti siste kommunesamaslåingane i landet var det Sp-ordførarar på ei eller begge sider av bordet. Men reforma manglar eit breitt nok fundament i Stortinget og er prega av hastverk, meiner Gangstad.