(Mørenytt:) Driftsinntektene auka frå 58,8 millionar i 2015 til 83,3 millionar i fjor. Det er betydeleg meir enn venta. Resultat før skatt vart i 2016 på 4,3 millionar mot 2,5 millionar i 2015, syner rekneskapen. Ifølgje dagleg leiar Bjørn Meek ligg det i år an til at omsetninga og lønsemda vert på linje med fjoråret.
Nye ingeniørar
I ei tid der oppdragsmengda aukar, har Bjørdal Industrier, ifølgje Nett.no, tilsett fem ingeniørar og to i produksjonen til no i år. I tillegg er fire produksjonsarbeidarar innleigde. Arbeidsstokken i Bjørdal Industrier er no oppe i rundt 40 personar, men det kan kome endå fleire.
No er det i stor grad fisk- og oppdrett som tel for bedrifta som er lokalisert i industriområdet ved flyplassen. Rundt 60 prosent av driftsinntektene har kome frå leveransar til fiskerinæringa, 25 prosent til oppdrett og resten frå bygg. Siste tida har det vore stor interesse for Bjørdal-produkt til akvakultur og oppdrettsnæringa. Og i vår har det kome fleire nye bestillingar på notvaskarar til havbruksnæringa og fleire leveransar av smoltsorteringsmaskiner, opplyser bedrifta.
– Lang fartstid innan produktutvikling og vår unike evne til å levere kvalitet borgar for framleis vekst med desse og fleire andre produkt, seier dagleg leiar Bjørn Meek.
Bjørdal har saman med Netkem som salspartnar ei rekkje gigantiske notvaskarar i produksjon for levering utover i 2017. Bjørdal har saman med Netkem produsert og utvikla notvaskarar over fleire år, og har levert med suksess til ei rekkje anlegg i Noreg.
Bjørdal sine rullesorterarar har også vorte ein bestseljar innan smoltproduksjon, og bedrifta produserer no desse til fleire av dei store aktørane innan smoltoppdrett.
I fjor kjøpte dagleg leiar og medeigar Bjørn Meek ut kompanjongen Elling Bjørdal. I vår vart Jan Sigve Søvik ny medeigar. Og no eig Meek/Søvik Bjørdal Industrier 59,5/40,5 prosent gjennom PE Bjørdal as, skriv Nett.no. Søvik kjem frå Volda og er også styreleiar i Bjørdal Industrier.
Denne saka vart først publisert i Møre-Nytt.