Full stopp i dette masseuttaket på Ytterland

Det er Opshaug Sandtak AS i Stranda som i fleire år har teke ut masse på området som ligg rett sør for idrettsanlegga til IL Valder.

Opshaug har planar om å bygge 120 nye bustader på den nesten nitti mål store tomta.

Umiddelbar stans

No krev kommunen umiddelbar stans av all sprenging og steinknusing på Ytterland.

Masse som allereie er knust skal ikkje køyrast ut, området skal fysisk stengast av og sikrast slik at det ikkje er fare for folk.

Giske kommune meiner at det er teke ut meir masse enn det som er godkjent, og at det også er gjort uttak utanfor godkjent område.

I brevet til entreprenøren skriv kommunen at det ikkje er teke omsyn til miljøet og at det manglar forsvarleg sikring av området.

Formalitet

Dagleg leiar Lars Tore Opshaug i Opshaug Sandtak seier til Sunnmørsposten at han ikkje ynskjer å drive sakshand-saming gjennom avisa.

– Men slik vi ser det er dette snakk om formalitetar som det ikkje skal ta lang tid å bringe i orden, seier Opshaug.

– Vil dette få konsekvensar for dei planlagde bustadene?

– Nei, slik vi ser det vil dette arbeidet halde fram så snart formalitetane er i orden, seier Lars Tore Opshaug.

Avdelingsingeniør Stian Gard Sve opplyser at saka er under handsaming i kommunen, og at entreprenøren har imøtekome dei krava kommunen har stilt. Tiltaket er stoppa, og Opshaug vil gjennomføre omfattande sikringstiltak.

– Vi ser alvorleg på slike tilfelle og vil forfølge saka vidare. Det er ikkje teke stilling til kva følger dette vil få for entreprenøren og andre involverte, opplyser Sve.

Krater

Kva som vil skje med det gigantiske krateret som er sprengt ut, er det heller ikkje teke noko avgjerd om enno.

– Det er heilt klart alvorleg når inngrep i naturen av denne størrelsen skjer i friområde og utanfor regulert område. Under ei synfaring opplyste entreprenøren at dei hadde ein plan for oppfylling av mjuke masser i samband med rassikring. Dette er ikkje noko kommunen har godkjent eller blitt informert om, men vi er i dialog med entreprenøren om vegen vidare, opplyser avdelingsingeniør Stian Gard Sve.