I saksframlegg til neste styremøte i Helse Møre og Romsdal vil leiinga kutte 21 sengeplasser i Ålesund, 19 sengeplasser i Molde og 4 sengeplasser i Kristiansund.

Framlegget til sengereduksjon ved dei tre sjukehusa gjeld alle dei somatiske klinikkane, skriv administrerande direktør Astrid J. Eidsvik i framlegget.

Framlegga inneber reduksjon av ein sengepost ved Ålesund og Molde sjukehus.

Framlegga til omorganisering av sengepostar og sengereduksjon ved Molde og Ålesund sjukehus er Risiko- og Sårbarhets-analyserte (ROS).

Bekymringar

I ROS-analysane kom det fram fleire forhold som har skapt bekymringar både i leiargruppa og i fagmiljøa.

I høve til totaliteten i prosjekta vurderer ein samla risiko som stor for at det kan oppstå driftssituasjonar som gjer det vanskeleg å oppretthalde fagleg forsvarleg drift. Dette er i hovudsak knytt til at kompetanse vil forsvinne og at resultatet kan verte lågare aktivitet.

I tillegg inneber bygningsmessige tilhøve at ein også får mindre tal einerom og mindre fleksibilitet i bruken av senger og areal. Dette vil kunne gi store utfordringar i samband med stort pasienttilstrøyming og i periodar med epidemiar.

Nedbemanning

Ein sengereduksjon på 44 senger inneber ei nedbemanning, i følgje direktøren.

- Det eksakte talet på reduksjon i tal tilsette er førebels ikkje klart. God dialog med tilsette og involvering av tillitsvalde og vernetenesta i det vidare arbeidet, er avgjerande.

Ubetalt spisepause

Leiargruppa i Helse Møre og Romsdal har vedteke at alle einingar skal ordne arbeidet slik at spisepause som full fritid kan bli gjennomført som hovudprinsipp. Alle medarbeidarar i HMR skal på dagtid frå og med måndag til og med fredag ha krav på ein halv times kvilepause eksklusiv arbeidstida, det vil seie ubetalt spisepause.

Helseføretaket vil tene 5 millioner kroner på dette tiltaket.

Forventa kostnadsreduksjon knytt til alle prosjekta har ein heiårseffekt på 30 millioner kroner.

Budsjett og saksframlegga skal opp i styremøtet i Helse Møre og Romsdal 21.november.