I dag fekk Vanylven kommune beskjed om at det blir kutt i ambulansetenesta i kommunen. Det var frå før snakk om at også døgnbilen i Ulstein skulle gjerast om til dagbil, fordi Ambulanse Midt-Norge måtte spare 25 millionar kroner til 2014-budsjettet.

- I Ulstein blir ingenting endra. Det vil seie at Ulstein får ein betre transport-situasjon med ein ekstra ambulanse med to båreplassar. Vaktlag nummer to vil no kunne velje bil, seier logistikksjef Jon-Ola Wattø i Ambulanse Midt-Norge.

Konkret blir det altså ein større bil stasjonert i Ulstein enn før.

Bil nummer to i Ulstein skal ha ei transportrolle på søre Sunnmøre i kvardagane, og ta såkalla grøne oppdrag. Det er meint for å hindre at akuttbilane vert brukt til reine transportoppdrag.

Den forrige bilen var 85 prosent av tida i rein beredskap.

- Betre for akuttsituasjonen

På kveld, natt og i helg skal bilen fungere som før. I 2013 hadde bil to i Ulstein 173 akuttoppdrag, 253 hasteoppdrag, og 338 reine transportoppdrag.

- Dette vil betre situasjonen med akuttambulansar på heile søre Sunnmøre, men krevjer ruteplanlegging av AMK, meiner Wattø.

AMK vil framleis disponere nærmaste ressurs etter behov - uavhengig om bilane er i Volda, Ulstein eller Vanylven for den del.