Nominasjonskomiteane for kyrkjevalet i Møre og Romsdal har klargjort kandidatlistene sine. I september skal ni representantar veljast til nytt bispedømeråd/Kyrkjemøte.
I ei pressemelding skriv Møre bispedømme at nominasjonskomiteane ikkje har lukkast med å finne kandidatar under 30 år. Dei har lagt vekt på kandidatane sitt syn på aktuelle kyrkjelege spørsmål, noko som i følgje dei inneber at kandidatane på lista representerer ulike syn.
Burde vere minst 20 prosent under 30
I kandidatlista finn vi mellom andre Ragna Dahl Grønnevet, som er pensjonist og tidlegare rådmann i Ålesund kommune. Den yngste kandidatenpå lista er 33 år gamle Ragnhild Lakang Nordmark Due, som er sokneprest i Nesset. Sjå heile lista nedst i saka.
Åpen folkekirke i Møre, som stiller med ei alternativ liste til kyrkjevalet, reagerer kraftig på at nominasjonskomiteen ikkje fyller dei formelle krava til aldersrepresentasjon, som seier at minst 20 prosent av kandidatane på lista skal vere under 30 år. På bispedømmet si liste er nemleg ingen av kandidatane under 30.
— Dette er ikkje eit frivillig kriterium som nominasjonskomiteen kan velje å følgje eller ikkje følgje. Skal vi ha relevant folkekyrkje, så treng vi menneske i alle aldrar, skriv dei i ei pressemelding.
Har gjort ein innsats
Leiar i valrådet i Møre bispedømme, Rolf Myhre, bekreftar at det stemmer at nominasjonskomiteen ikkje har greid å fylle dei formelle krava.
— Men dei har gjort ein iherdig innsats og prøvd å få tak i kandidatar under 30 år, seier han.
— Vi tar til etteretning at nominasjonskomiteen ikkje har greid oppgåva si fullt og heilt til tross for iherdige forsøk, legg han til.
Åpen folkekirke arbeider no med å ferdigstille si eiga liste til kyrkjevalet. Grunnen til dette er at dei meiner det må finnast tydelege alternativ.
— Åpen folkekirke ønsker ei brei og open folkekyrkje. Vi kjem derfor til å stille med ei liste med kandidatar med breidt aldersspenn, med geografisk breidde og med ulik bakgrunn, seier dei.
Den fullstendige kandidatlista er:
Leke
Ann Kristin Sørvik ( 57) - ordførar, Bremsnes sokn
Ragna Dahl Grønnevet (67) - pensjonist, Ålesund sokn
Frode Rabbevåg (55) - dagleg leiar, Molde sokn
Geir Grav (59) - rektor, Hen sokn
Ole Martid Grevstad (45) - personalsjef, Ulstein sokn
Berit Moan Møkkelgård (39) - sjukepleiar, Rindal sokn
Solveig Linge Stakkestad (70) - pensjonist, Norddal sokn
Svein Hartvig Pettersson (48) - rådgjevar, Molde sokn
Rikke Grevstad Kopperstad (54) - lærar, Herøy sokn
Eldar Husøy (64) - lærar, Ulstein sokn
Olav Terje Flataker (62) - dagleg leiar, Bolsøy sokn
Christina Duwe (51) - overlege, Spjelkavik sokn
Hans Gunnar Møller (36) - electronic technician, Spjelkavik sokn
Synnøve Stenvågnes Bersås (66) - pensjonist, Kors sokn
Ivar Husby (69) - pensjonist/næringsdriande, Aure sokn
Laila Elnes Bielachowicz (55) - lærar, Sekken sokn
Jon Bovim (67) - pensjonist, Brattvåg sokn
Ann Margtritt Harstad (59) - lærar, Øre sokn
Prestar
Ragnhild Lakand Nordmark Due (33) - sokneprest, Nesset sokn
Sindre Stabell Kulø (35) - sokneprest, Bud sokn
Per Eilert Orten (60) - sokneprest, Aure sokn
Lars-Ove Skaret (54) - sokneprest, Nordlandet sokn
Kari Vatne (52) - sokneprest, Stordal sokn
Kyrkjelege tilsette
Robert Coates (60) - kantor, Sandøy sokn
Mildrid Fiske (58) - kyrkjeverje, Kristiansund sokn
Aud Toril Gagnat (52) - kyrkjeverje, Gjemnes sokn
Svein-Rune Johannessen (54) - kyrkjeverje, Ålesund sokn
Olav Rønneberg (56) - kateket, Ørskog sokn