Det går fram av stortingsmeldinga om strukturen i høgare utdanning som kunnskapsminister Torbjørn Røe Isaksen la fram onsdag, skriv Mørenytt. Inntil vidare får Høgskulen i Volda halde fram som sjølvstendig institusjon.
14 universitet og høgskular skal bli til fem. Fleire andre sammenslåingar er til utgreiing, fortalde Røe Isaksen.
Avklaring
For 13 ytterlegare institusjonar skal framtida avklarast på grunnlag av nye og skjerpa kvalitetskriterium, fortalde statsråden. Mørenytt skriv at dette vil gjelde for Volda:
– Vi ser på kor mange tilsette som har doktorgrad, kor mange studentar som søkjer og gjennomfører høgare utdanning, og kor mykje tid studentane brukar på studia. I tillegg vurderer vi kor mykje forsking som blir publiser, og kor mykje eksterne forskingsinntekter institusjonane får, seier Røe Isaksen.
Fredag blir heile stortingsmeldinga offentleg.
Ikkje tvang
Isaksen har tidlegare vore tydeleg på at han vil opne for tvangssamanslåingar for å sikre større og meir robuste fagmiljø. Fordi så mange institusjonar har tatt initiativ til samanslåingar på eiga hand, er det ikkje nødvendig i første omgang, seier Isaksen til NTB.
Reforma inneber skjerpa krav for å få tilby master- og doktorgradsutdanningar framover. Departementet opphevar også dagens «frys» for høgskular som ønskjer å bli universitet, men innfører nye og strengare krav for høgskulane som vil ta «steget opp».