Høgre sin nestleiar og kommunalminister, Jan Tore Sanner, hadde rolla som julenisse i april på landsmøtet til Høgre.
Først lova han at den såkalla ferjeavløysingsordninga for fylkesvegsamband endeleg kjem på plass.
Deretter lova han meir pengar til kommunane over revidert nasjonalbudsjett.
Dermed kunne spesielt to personar smile breidt, og det er Høgre sine stortingspolitikarar Helge Orten ( Møre og Romsdal) og Bjørn Lødemel ( Sogn og Fjordane).
Nordøyvegen er sikra
Avgjerande for store prosjekt
For ei utviding av ferjeavløysingsordninga har vore ei av deira hjartesaker.
- Dette har vi kjempa for lenge. No er vi i regjering, og det er utruleg kjekt at vi kan levere, seier Lødemel og Orten.
Ordninga betyr at pengar som fylkeskommunen i dag bruker til å subsidiere ferjedrift, i staden kan gå inn i finansieringsgrunnlaget for planlagde bruer, tunnelar og vegar.
For Møre og Romsdal sitt vedkomande vil dette i første omgang sikre finansieringa av Nordøyvegen. Pengar som i dag vert brukte i rute 21 og 22 kan i staden brukast til å finansiere vegare og tunnelane som skal gjere Nordøyane landfaste.
- Ordninga er avgjerande for å sikre viktige prosjekt, seier Charles Tøsse, som er fylkesordførarkandidat for Høgre i Møre og Romsdal.
Viktig også for kystvegen
I Sogn og Fjordane skal ferjeavløysingspengar i første omgang gå inn i finansieringa av ytre kystveg, mellom Vågsøy- Bremanger- og sørover.
- Folk i distrikta synest det er betre med bru enn ferje, seier Noralv Distad, fylkesordførarkandidat i Sogn og Fjordane.
Meir pengar til kommunene
Kommunalminister Jan Tore Sanner lova og meir pengar til kommunane.
- I revidert budsjett vil vi på nytt sjå på rammene i kommuneøkonomien, særleg i lys av skattesvikten som mange opplever, sa Sanner i si tale til landsmøtet.