Møre og Romsdal er blant fylka som ventar lavast vekst i talet på tilsette. Det viser Nav si bedriftsundersøking for 2015.

Bedriftsleiarane er spurt om dei ventar fleire eller færre tilsette om eitt år.

15 prosent av bedriftene ventar fleire tilsette neste år – 12 prosent ventar færre tilsette.

Dette er den svakaste forventninga på meir enn 10 år, ifølgje Nav.

Industrien ventar ei forsiktig auke i talet på tilsette. Det gjer også produksjon av metallvarer, produksjon av maskiner og utstyr og produksjon av elektriske og optiske produkt.

Nedgangen kjem først og fremst innan olje og petroleum.

Sunnmøre

Bedriftene på Sunnmøre er litt meir optimistiske enn i Romsdal og på Nordmøre. På Sunnmøre trur 15 prosent av bedriftsleiarane at dei har fleire tilsette om eit år – mens 10 prosent trur dei har færre tilsette.

I Romsdal er bildet motsett: Meir enn 15 prosent ventar færre tilsette, mens knapt 10 prosent ventar fleire.

Manglar arbeidskraft

Samtidig er Møre og Romsdal eit av fylka med størst mangel på arbeidskraft. Mangelen er størst innan helseyrke og læraryrke.

Særleg innan sjukepleie er mangelen stor, viser Nav si undersøking. Men for Sunnmøre er rektor Marianne Synnes ved Høgskolen i Ålesund optimistisk. For få dagar sidan kunne ho fortelje om eit rush av søknader, særleg til sjukepleien.

– Dei gode tala viser at Høgskolen har eit tilfredsstillande rekrutteringsgrunnlag til å forsyne regionen med helsepersonell i åra framover, sa rektor Marianne Synnes ved Høgskolen i Ålesund til Sunnmørsposten.