I tingretten blei mannen frikjent for grov mishandling av eks-sambuaren. I lagmannsretten er han derimot funnen skuldig.
Statsadvokaten anka saka etter at ein mann i 50-åra i Sunnmøre tingrett blei frikjent for grov mishandling av sambuaren. Straffa i tingretten var ei bot på 9.000 kroner.
Må sone eitt år
I Frostating lagmannsrett er mannen no dømd til fengsel i eitt år og seks månader. Eit halvt år av straffa er på vilkår, med to års prøvetid.
Han må også betale den tidlegare sambuaren 80.000 kroner i oppreisingserstatning.
Søkte tilflukt
Mannen er dømd for å ha kasta sin dåverande sambuar ned ei steintrapp. Der tok han strupetak/kvelartak på henne og slo hovudet hennar fleire gonger mot veggen.
Kvinna rømde ut av huset og søkte tilflukt i eit anna hus. Ho sperra for inngangsdøra, men mannen kom litt seinare og sparka seg inn. Også ein dag seinare braut mannen seg inn i huset. Han ropte og var sint fordi kvinna hadde kontakt med ein annan mann.
Var livredd
Kvinna prøvde å søke tilflukt, men mannen følgde etter, tok kvelartak på henne, drog henne ned på golvet og slo hovudet hennar mot veggen fleire gonger. Kvinna var livredd og trudde han skulle drepe henne.
Mannen nektar på si side for å ha brukt vald mot kvinna, med unntak av i sjølvforsvar.
Lagmannsretten festar ikkje lit til forklaringa, men meiner kvinna har vore utsett for valdsutøving med karakter av mishandling. Det handlar om gjenteken mishandling, der også barn har vore vitne.
I dommen blir det vist til at lovgivar har skjerpa straffa for vald i nære relasjonar.
Mannen er også dømd for drapstruslar han sette fram mot ein mann han ifølgje dommen hadde fått vite at sambuaren hadde eit forhold til.