Det kan bli kraftig torevêr og tropenatt

Det er varmt i nordvest også i dag.

– Det ser ut til å bli temperaturar over 30 grader, seier meteorolog Anne Mette Olsen ved Vervarslinga på Vestlandet.

– Klokka 12 hadde vi Ørsta-Volda lufthamn med 27,6 grader som høgste temperatur i Møre og Romsdal.

Torevêr

I kveld er det venta torebyer inn mot Vestlandet, særleg sør for Stad. Over Shetland ligg det torsdag eit kraftig torevêr som er på veg austover. I løpet av kvelden kan det treffe land, som er kraftig oppvarma.

– Dersom det blir regnbyer i kveld, blir det også tore i det, seier meteorologen.

Fredag kveld eller natt til laurdag er det venta regn frå Sunnmøre og sørover. Sunnmøre vil truleg gå klar av det verste. Det er venta at Hordaland får den verste støyten.

– Det har vore kraftig tore borte ved England, dette har dabba av etter kvart, men det kan ta seg opp igjen når det kjem på land og det er så varmt, seier Olsen.

Tropenatt?

Meteorologen seier det no er ei lita mulegheit for tropenatt på Nordvestlandet. Tropenatt vil seie at det er meir enn 20 grader mellom klokka 20 og 08.