Fotograf Eva Rose Furmyr frå Fosnavåg har spesialisert seg på å ta bilete av fødslar. Etter mange år med fødselsfotografering hadde ho ei utstilling med nokre av dei beste bileta i Oslo Rådhus i november i fjor.
Ho kalla utstillinga "Mirakler".
- Tilbakemeldingane var fantastiske. Eg var spent på korleis bileta skulle bli mottekne, og hadde ikkje tort å drøyme om at folk skulle vere så positive som dei var. Fleire i helsevesenet fortalte til og med at dei fekk fri frå jobben sin for å gå og sjå utstillinga, ler Furmyr.
52 fødslar
Til no har ho dokumentert 52 fødslar. Dei fleste i og omkring Oslo, der ho bur.
No vil Furmyr at folk heime i Fosnavåg skal få sjå kva ho driv med.
Til helga har ho utstilling i det som ein gong var bestefaren sin fotobutikk, Fotograf Furmyr. Den blei lagt ned i 2009.
- Etter det har lokala vore leigd ut, men akkurat no står dei tomme, og dei kvite veggane får det til å likne eit galleri. Eg innsåg med eitt at dette er det perfekte lokalet å stille ut i.
Vil ut i verda
Furmyr både gler seg og er spent framfor utstillinga laurdag og søndag.
- Eg veit kva slags ull folket i Fosnavåg er laga av, og er spent på om dei tør å komme. Særleg mannfolka, ler fotografen.
Det neste prosjektet til Furmyr er å reise ut i verda og dokumentere korleis det er å føde i utviklingsland.
- Eg har fått med meg to dokumentarfilmskaparar på ideen, og vi jobbar no med å få alt det praktiske i orden, seier Furmyr.