Dave King fortel at han vart inspirert av å lese om ei vising av Jaws (Haisommer på norsk) i England, der publikum sat på flyteringar i eit basseng og såg filmen.
– Eg tenkte at vi kunne få til noko betre. Basseng er for pyser, ler King.
Populært
For fem år sidan kom briten til Norge for å undervise i animasjon på Høgskulen i Volda.
Då han oppdaga at studentane ofte ikkje hadde sett gamle filmar han refererte til i undervisinga, tok han til å vise gamle filmklassikarar på skulen ein gong i veka.
– Desse visingane vart så populære, og då ein DJ på Det Grøne Treet føreslo at eg kunne vise filmar der, vart Dave's Movie & Music Nights til.
Løft
I samband med studiestart denne hausten og ny filmkveld-sesong, ville Dave King finne på noko som kunne løfte arrangementet.
Han og kollega Jon Harman, også han brite og svært filminteressert, hadde snakka om at dei burde vise Jaws – som har 40-årsjubileum i år.
Dei to kom på at dei kunne legge filmvisinga om bord i ein båt.
Mangla båt
– Vi mangla berre båten. Men så, medan eg var på ferie i sommar, las eg om passasjerbåten Fjordkongen som tilbaud turar med servering i Volda-området. Båten var perfekt. Og båteigar Terje Kragset var umiddelbart med på planane våre, fortel King.
Fredag 11. september er det altså duka for ei heilt spesiell filmvising i Volda.
Jaws frå 1975 er ein av filmhistoria sine største suksessar, og var den første filmen som passerte 100 millionar dollars-grensa på kino i USA.
Stemning
– Jaws var den første filmen som fekk meg til å forstå litt av korleis ein lagar film, fortel Jon Harman.
Dave King understrekar at filmvisinga er open for vaksne i alle aldrar. Som alltid på Dave sine filmkveldar, vil han snakke litt om filmen i førkant av visinga. – Eg prøver å gi ein kort, underhaldande og informativ introduksjon. Eg ønskjer å setje publikum i den rette stemninga og overføre mi entusiasme for desse filmane til dei, seier han.
