Det seier både kontaktlærar Kristina Grimstad Nordstrand og elevane i 7a ved Valderøy barneskule.
Torsdag førre veke la læraren ut eit bilde med følgjande tekst på Facebook:
«Vi i klasse 7a ved Valderøy barneskule lærer om nettvett! Vi vil finne ut kor lett det er å spreie eit bilete på internett. Del!!». Saman med dette skreiv Nordstrand kort: «Håper alle vil dele dette».
Har gått landet rundt
Og folk har delt. Vi har sett bildet dukke opp på Facebook-profilar til folk i distriktet her, så vel som hos folk i Oslo og på Sørlandet. Måndag føremiddag var bildet delt over 36.000 gongar.
- Eg har til og med høyrt rykte om at det er delt i Sør-Korea. Responsen er over all forventning, seier Nordstrand.
Om å misse eigarskap
Bakgrunnen for prosjektet er at elevane – som det også går fram i teksten som vart lagt ut – for tida arbeider med nettvett som tema på skulen.
- I uke 34 først med kommunikasjon, og så førre veke og denne veka med kommunikasjon på internett. Når det er sagt er dette med nettvett eit stadig tilbakevendande tema, fortel læraren. Det var ho som hadde ideen om prosjektet.
- Den er inspirert av liknande opplegg. Sånn «pappa sluttar å røyke om han får 1 million likes». Eg tenkte eit sånt prosjekt kunne vere ein fin måte å gjere unge meir bevisst på kor stor makt internett har, for det har det. Deler ein noko på nettet misser ein fort eigarskap til det. Det blir delt, delt og delt, og sjølv om ein slettar det ein sjølv ein gong delte vil det framleis vere der, i systemet, påpeikar ho.
Lite på Facebook sjølve
Dei unge i 7a er mest ikkje på Facebook, fortel dei. På bildedelingstenestane Instagram og ikkje minst på Snapchat, derimot.
- Eg har opplevd at ein kompis tok bilde av meg utan at eg visste det og delte det på Instagram, seier Leander Giske Hjelle.
- Eg også. At ei venninne gjorde det, seier Ina Dajanna Ervik.
Klar lærdom
Ingen i klassen er i tvil om lærdomen etter prosjektet:
- Det er viktig å tenke over kva vi legg ut, seier Kristine Viddal Dyb.
- Etter denne veka er de ferdig med temaet. Slettar de bildet, då?
- Nei, seier lærar Kristin Grimstad Nordstrand.
- Eg tenkjer vi lar det liggje. Men eg for min del har litt etterarbeid eg må ta. For det første må eg sjekke at eg ikkje har open profil på Facebook – eg valde nemleg å gjere bildet offentleg då eg delte det der, og er ikkje heilt sikker på om eg gjorde det på rette måten.
- I tillegg har eg altså fått over 300 venneførespurnadar på Facebook etter at eg delte bildet. Eg kjenner maks sju av dei.