Trur ikkje føden blir fjerna

Det meiner kommuneoverlegen i Herøy, Bjørn Martin Aasen.

Han er overtydd om at fødeavdelinga i Volda ikkje blir fjerna trass i at sjef for Kvinneklinikken, Janita Skogeng, i sin høyringsuttale skriv at fødeavdelinga bør sentraliserast til Ålesund, og at det bør bli ei jordmorstyrt fødestove i Volda.

Les også:

Tilbakeslag

– Kva vert konsekvensane for folk i Herøy dersom fødeavdelinga i Volda likevel blir nedlagt?

– Då må alle førstegongsfødande, pluss dei som er definerte som risikofødslar, sendast til Ålesund.

Reisetida i bil eller ambulansebil i Ålesund blir lengre. Den blir den same som fødande hadde til Volda sjukehus før Eiksundsambandet. Ein må tilbake til følgjeteneste med jordmor, påpeikar kommuneoverlegen.

Frå Fosnavåg tar det ein time og 25 minutt til Ålesund, til Volda er reisetida 45 minutt. Det er halvparten så lang tid som til Ålesund.

Betre sjukehus

Aasen trur at framtidige endringar i sjukehusvesenet vil gje eit styrka tilbod i Volda.

– Det blir meir sentralisering, men også meir desentralisering, seier han.

– For 15 år sidan opererte dei alle typar kreft ved Volda sjukehus. Det gjer dei ikkje i dag. Kreftoperasjonar vart flytta frå Volda til Ålesund og frå Ålesund til Trondheim. Det inneber ei dramatisk endring. Vi må ta inn over oss at dette aldri vil bli reversert.

Vi vil aldri bli operert for svulst i tarmen eller liknande av ein lege som gjer dette to eller fire gonger i året. Det syner seg også at det beste resultatet har dei som gjer dette heile tida, påpeikar Aasen.

Meir om sjukehuskampen: Vil utvide Helse Sunnmøre

Beinbrot døgnet rundt

Han var sakshandsamar for høyringsuttalen frå Herøy kommune som går inn for ei løysing med akuttvakt heile døgnet innan ortopedi, men der bløtdelskirurgien kan bli gjort om til ein femdøgnspost. Akuttberedskap innan indremedisin og gynekologi/føde vil dei halde på som no.

– Største utfordringa i dag er eldre kvinner med fallskadar og beinbrot. Det er enklast å legge ned bløtdelskirurgien og bevare akuttberedskapen i ortopedien. Statistisk sett opererer legane i Volda ein «bløtdelspasient» kvar 10. natt, påpeikar Aasen.

Han trur behovet for legekompetanse vil auke på det indremedisinske området i takt med at sjukdomsbiletet endrar seg i befolkninga.

Volda-legane: – Om fem år er det slutt

– Legeforeininga seier det går ut over rekrutteringa viss ein fjernar akuttberedskapen?

– Det har eg registrert. Legar har ein tendens til å søke dei fagleg sett mest utfordrande jobbane. Køen er størst ved utdanningstillingane ved dei høgspesialiserte sjukehusa. Eg er overtydd om at også legane må tenke annleis for framtida, seier Bjørn Martin Aasen.