Ungt leiartalent frå Ulstein

Eg tek det absolutt som ein fin måte å bli verdsett, ikkje minst fordi det er gjort så grundige vurderingar

Are Garshol, Ulstein

Næringslivssida E24 presenterte onsdag lista over det ein handplukka jury meiner er dei 100 største leiartalenta på maksimalt 35 år i Norge. Der står altså Are Garshol.

Han er divisjonsdirektør for logistikk i Grieg Logistics, del av Grieg-konsernet i Bergen.

- Eg har ansvaret for 13 avdelingskontor i Norge og kontora våre i Rotterdam og Shanghai, seier Garshol.

Grieg Logistics har store kundar innan olje og gass, shipping og den maritime industrien. Mellom anna handterar selskapet ifølgje Garshol 35.000 sendingar for StatoilHydro kvart år.

Overraska

Kåringa til E24 var ikkje Garshol kjent med før han i løpet av onsdagen fekk fleire meldingar om at han var på lista. Og det tek han som ei fin fjør i hatten.

- Eg blei litt overraska sjølv. Hadde ikkje høyrt om denne kåringa før. Men eg tek det absolutt som ein fin måte å bli verdsett, ikkje minst fordi det er gjort så grundige vurderingar, seier Garshol.

Lista er etter arbeid av to rekrutteringsfirma redusert frå over 1000 namn til litt over 100.

Ein jury på fire, leia av den profilerte kommentatoren Elin Ørjasæter, har så plukka ut dei 100 og vidare dei ti største leiartalenta.

Desse skal presenterast dei komande dagane. Med seg i juryen har ho Trygve Walstad, spesialist på leiarrekruttering og partner i Delphi Consulting, Cathrine Foss Stene, tidlegare HR- og kommunikasjonsdirektør i Schibsted, Jan Bjørneboe, konserndirektør for utvikling i ISS Facility Services.

Ulstein viktig

Langt dei fleste på lista held til i Oslo-området, men det er også innslag frå Trondheim, Bergen, Stavanger, Tromsø - og altså Ulsteinvik.

Tittelen og ansvaret til trass, Garshol har valt å bu i Ulsteinvik og det er slett ingen ulempe. Snarare meiner Garshol at basen på Sunnmøre er ganske så avgjerande for at han kan ha den krevjande stillinga han har.

- Eg er mykje ute og fartar, tre-fire dagar i veka. Men det å bu her eg kjem frå er også nøkkelen til at eg kan ha det slik. Eg kan trekke meg vekk og tilbake. Det passer meg veldig bra, seier Garshol.

Dessutan er kona også frå Ulsteinvik, og saman har dei to born, ei jente på fem år og ein gut på eitt år.

- Eg har utdanning frå Norges Handelshøyskole og jobba i Bergen i tre år før vi flytta heim. Med to små born blir det enklare å bu her. Det gjev meg også litt bedre samvet for å halde på slik. Ulsteinvik har også eit spennande miljø å vere i også når det gjeld næringslivet her, seier Garshol.

Vel Vigra

Som er godt kjent med hurtigbåt og flyruter - frå Vigra.

- Det blir mykje tid på buss, drosje, hurtigbåt og fly. Der det - i alle fall i prinsippet - går an å bruke tid på å lese saksdokument.

- Flyg du frå Hovden eller Vigra?

- Det blir nok Vigra. Hovden hadde vore enklare, men eg flyg så mykje at eg har årskort. Og det tilbyr ikkje Widerøe.

- Med Garshol som etternamn, er du kanskje i slekt med den gamle storsprintaren Audun Garshol (norsk rekordhaldar på 100 meter med 10.55 sekunder frå 1972 til 1986, journ.anm.)?

- Kanskje langt uti. Ikkje er eg spesielt rask heller, seier Are Garshol.

Til gjengjeld er det få som slår tempoet hans i næringslivskarrieren.

PS: Per Olav Monseth (31), sjef for finans og forretningsutvikling i Polaris Media og styremedlem i Sunnmørsposten er også på lista over dei 100 leiartalenta.

Det same er raumamannen Øystein Skiri (35), gründer av mobilselskapet Boost Communication og bror til AaFK-spelar Amund Skiri.