Her er det no sett av to dagar til rettssak i november.
– Partane er einige om kva dei er ueinige om, men har ein løpande dialog, seier advokat Lennart Garnes i Advokatfirmaet Steenstrup Stordrange DA.
Han representerer Stranda Hamnevesen.Og det dei er ueinige om er avgiftene i Geiranger.
Same avgift
Usemja mellom hamnevesen og reiarlag kom for dagen hausten 2011 då Stranda Hamnevesen vedtok å krevje same hamneavgift frå Hurtigruten som frå cruiseskipa.
Det nye frå 2012 var at hurtigruten skulle betale avgift for alle passasjerar som er om bord i hurtigrutene. Tidlegare har dei berre betalt for dei passasjerane som har gått i land, medan cruiseskipa heile tida har betalt for alle passasjerane.
Halv million
Dette likte Hurtigruten dårleg. For ei slik omlegging vil bety om lag ein halv million kroner i ekstrautgifter for Hurtigrutene ASA.
– Ein halv million kroner er mykje pengar for oss, har kommunikasjonssjef Ragnar Norum i Hurtigruten tidlegare uttalt til Sunnmørsposten.
– Det er prinsipielle spørsmål partane er ueinige om, legg advokat Garnes til – utan å ville prosedere saka på førehand i avisa. Han ventar til rettssaka i november.
Det gjer også Hurtigruten sin advokat, Mats E. Sæther i Nordisk Skibsrederforening / Nordisk Legal Services.
– Partane står langt frå kvarandre i dag. Men det blir sendt prosesskriv til kvarandre, så får vi sjå om det er grunnlag for nokon diskusjon, seier Sæther.
Klage avvist
Hurtigruten prøvde tidlegare i år også å klage hamnevesenet inn for Konkurransetilsynet, utan hell.
I eit brev til Konkurransetilsynet hevda Hurtigruten at hamnevesenet bryt både konkurranselova og pristiltakslova. Reiarlaget bad difor Konkurransetilsynet om å gripe inn. Men tilsynet avviste klaga.Striden mellom dei to er også ein av årsakene til at Hurtigruten begynte å sjå seg om etter andre vestlandsfjordar å segle inn i, og valde Hjørundfjorden.