– Dette kunne blitt ei katastrofe, seier Roar Kjølås på Fjordlaks sitt oppdrettsanlegg ved Fausa i Storfjorden.
Ei sandskuta passerte med veldig liten klaring ute på enden av anlegget. Der klipte den eine forankringa til anlegget, før den køyrde i fjellet.
Sjå to videoar over
Hendinga skjedde ved Skotungneset litt før klokka 13 fredag.
– Om fisken hadde rømt, kunne det blitt ei naturkatastrofe i fjorden, seier Kjølås.
Sandskuta gjekk vidare innover til Valldal.
Der var politiet om bord og snakka med skipperen. Dei trur skipperen har sovna på vakt.
– Vi har ingen mistanke om promille. Det er grunn til å tru at skipsføraren kan ha sovna på brua, seier operasjonsleiar Trygve Ødegård i Sunnmøre politidistrikt til Smp.no.
Politiet opplyser at dei kjem til å opprette sak og forfølgje dette vidare.
– Vi har også hatt kontakt med Sjøfartsdirektoratet i saka, seier Ødegård fredag kveld.