Miljødirektoratet har avgjort at ulven som vart felt på skadefellingsløyve i Sykkylven 5. juni, skal sikrast for framtidig forsking og ivaretakast til opplysningsformål. Og det skal skje ved at han blir overlatt til Sykkylven Naturhistorisk Museum i Sykkylven.

Ulv og andre sjeldne artar som vert felt på skadefellingsløyve, er Staten sin eigedom, og tilhøyrer Viltfondet. Eventuell tildeling vert nøye vurdert, og høgst prioritet har vitenskaplege formål.

Sykkylven Naturhistoriske Museum har hatt ein god dialog med både Miljødirektoratet og forskingsmiljøet ved Universitetet i Oslo, fortel avdelingsleiar Magnhild Vatne ved museet.

Ulven vil bli stoppa ut og inngå i museet si nye utstilling Mosaikk, der rovviltforvalting før og no er eitt av mange tema. I tillegg vil museet formidle kunnskap om denne spesielle ulven.