Oppdatering: Nordøyruta er i gang igjen frå klokka 14.30, opplyser Norled.
Tysdag morgon møtte ein gjeng fram på kaia på Haramsøya for å ta 09.20-båten til byen.
– Vi visste om at det var problem i går men rekna med det kom ny i dag, det er det som er vanleg på dette sambandet, seier Lena Farstad Hagen på Haramsøya.
Rolf Longva (H), leiar av trafikknemnda i Haram, er frustrert:
– Eg har prøvd å ringe Norled fleire gonger i dag, det er ingen som veit noko, fortel Longva. – Ei kort melding i går kveld om at båten er innstilt er for lite informasjon. Når vi ikkje får anna beskjed, så er det heilt normalt at det kjem ny båt, ifølgje Longva.
Norled: To uhell samtidig
Samtidig med at hurtigbåten i Molde er på årleg klassing, oppstod det tekniske problem på to hurtigbåtar på Nordvestlandet.
Norleds reservebåt går som planlagt i Molde. Og «Nordic Lady», som tilhøyrer 62 grader nord, er erstatningsbåt på Langevågsruta.
Dermed hadde ikkje Norled ein tredje båt å setje inn til Nordøyane.
– Dette må vi kalle uflaks, seier regionssjef for hurtigbåt, Bjørn Egil Søndenå, til smp.no.
– «Tidelyn» i Nordøyruta har nettopp vore på verkstad, og det oppstod ein følgjefeil etter det verkstadopphaldet, forklarar Søndenå.