– Det hende i Herøys gamle, gamle tid. Det hende i Herøys gamle, gamle tid.

Mystisk musikk sett stemninga, og i Herøy amfi byrjar siste gjennomkøyring av ei tidsreise til Herøys gamle, gamle tid, og Noregs første vår.

Fredag kveld var om lag 200 barn og vaksne, profesjonelle og amatørar, orkester og kor i gong med generalprøva før årets Herøyspel, som går av stabelen i kveld og i morgon. På få dagar har vêret veksla mellom kulde og heit varme, mellom regn og yr – i dag får ein litt av alt. Regissør Gerald Pettersen gir dei siste instruksjonane før gjennomkøyringa.

– Hugs å spare på stemma, og hugs: for i kveld er det eitt stikkord. Age og respekt for kongen. Han vel å sjå på kulda med optimistisk blikk.

– Det blir i alle fall ingen svetting i dag! seier han til dei frammøtte.

Det er kaldt og friskt på generalprøva, men regnet held seg på avstand – og for helga ser det ut til at herøyingane har lokka vêrgudane over på si side. I dag er det meldt sol, medan søndagen er litt meir blanda.

Ny barnescene

Også under generalprøva blir nok skodespelarane varme nok, når kongen kjempar for å få kontroll på dei opprørske herjungane.

Det kjempast mellom gamal og ny tru, om kjærleik og plikt. Det er faklar og skrik og skrål, sverdkamp og trolldom, kjærleik, glede og sorg.

Mot slutten får også barna vise seg fram. Regissør Gerald Pettersen skriv ei ny barnescene kvart år.

I år handlar barnescena om moltukyra, og Pettersen har også fått med referansar til klimaendringar og dagsaktuelle tema i den 1000 år gamle settinga. Una Myren (10) har ei av barnerollene.

– Det er veldig kjekt å vere med, men eg er nervøs, fortel ho.

– Det beste med å vere med er at eg får vere her og sjå på spelet heile tida.

Kjende og nye namn

Regissør Pettersen, som til vanleg held til på Den Nationale Scene i Bergen, har vore med i alle år. Han har store forventningar til helga.

– Eg forventar at det strøymer på med publikum, seier han.

På scena er det både kjende og nye namn blant dei profesjonelle skodespelarane. Den unge, nyutdanna skodespelaren Ingrid Megård Sæter er med for første gong. Ho spelar den fagre Unn.

– Det er heilt fantastisk å vere med i ein slik produksjon. Det er også første gong for min del at eg spelar på ein slik utearena, der vêret får så mykje å seie. Det er veldig spesielt, seier ho.

På Herøy Amfi ved Herøy Kystmuseum er eit historisk spel og ein musikal som finn stad på 1000-talet. Foto: Olav Standal Tangen
Ketil Høegh speler Herøy-høvdingen. Han er også kjend frå TV-serien «Himmelblå». Foto: Olav Standal Tangen