Vil vekkje Volda

Rune Håndlykken er hyra inn av Volda kommune som pådrivar for nytt kulturhus. Volda-folket er utolmodige etter at det noko diffuse Egget-prosjektet rann ut i sanden etter ei snart ti år lang og kaotisk ørkenvandring.

– Prosjektet enda i splid. Men no ser vi framover, seier Håndlykken, som gjennom firmaet Kulturhusplan DA har planlagt ei rekkje kulturhus dei siste femten åra.

I skrivande stund er han involvert i prosjekt i Sandnessjøen, Stjørdal, Volda, Sortland, Os, Hamar, Kongsberg og Mandal.

Kyrkjegardspreg.

Håndlykken håper eit nytt kulturhus og hotell kan vere med og blåse liv i sentrum.

– Volda har vakse oppe i liane, men sentrum har stagnert. Volda kyrkje med kyrkjegarden er ein viktig del av sentrum, men vi må ikkje la resten av sentrum få kyrkjegardspreg, seier Håndlykken.

Han er lut lei av «grøne lunger» midt i sentrum.

– Vi har ikkje akkurat mangel på grøntareal på Sunnmøre! Nei, det må til ei massiv fortetting av sentrum – berre rådhuskvartalet har plass til 30.000 kvadratmeter ny bygningsmasse, og det må gå an å byggje meir i høgda. Først då kan Volda utvikle seg til ein moderne bygdeby.

Ingen rik onkel.

Mangel på lokale investorar som vil investere store pengar i sentrum er ein del av problemet.

– Ingen store investorar utanfrå kjem og byggjer hotell i Volda. Berre Thon kan finne på det. Nei, her trengst ei gruppe lokale investorar, store og små. Også på kulturhusbiten, for dette klarer ikkje kommunen åleine, seier Håndlykken.

Allianse.

Han er no i gang med å intervjue framtidige brukarar av kulturhus for å danne seg eit bilete av kva det er behov for.

– Førre prosess enda i strid. Alle stader der dei har lukkast med slike prosjekt, har det vore godt samarbeid og opne kanalar i alle retningar. Slikt som dette får ein aldri til når det er strid og konflikt.

I august/september presenterer han «funna» sine til politikarane.

– Løyver dei då planleggingsmidlar for 2011, og innarbeider arbeidet vidare i økonomiplanen, går vi vidare, seier Håndlykken.

Fjorden.

Han meiner det ville ha gjort seg med kulturhus og hotell ved fjorden, men vil ikkje vere absolutt.

– Men anlegget må liggje i indre sentrum. Og vi bør utlyse ein konkurranse om løysinga, både når det gjeld lokalisering og drift, seier Håndlykken, som veit at det vil hive seg på i alle fall eit par lokale grupperingar.