Husdraumen vart eit mareritt då det viste seg at huset var fullt av rotter. No får Linda Elisabeth Holstad og Harald Vilnes Holstad heve kjøpet.
Endret: 09.07.2010 kl. 13:37
Søre Sunnmøre tingrett har avgjort at Hareid-paret får heve kjøpet av eigedomen i Haugsbygda i Sande, ein eigedom paret kjøpte i april 2009 til ein prislapp på vel 1,2 millionar kroner.
Les også: Mareritt i rottehus
Seljarane Arjan og Gisella Bisschop er samstundes dømde til å betale tilbake kjøpesummen gjennom selskapet Am Trust International Underwriters Ltd, der paret har eigarskifteforsikring.
I tillegg må det hollandske paret betale sakskostnadene på 231.181 kroner.
Sjølv om kjøparane kjøpte huset «som det er», meiner retten at det etter avhendingslova i dette tilfellet har skjedd eit vesentleg avtalebrot. Retten viser til at det vil koste fleire hundre tusen å reparere skadene etter rotteangrepet, noko retten meiner er vesentleg.
Retten legg også vekt på at rotter etter sin art utgjer ein spesiell ekkel mangel som det knyter seg sterkt ubehag til å ha i hus.
Retten meiner at denne belastninga ikkje nødvendigvis vil forsvinne sjølv om skadane vert utbetra.
Huskjøparane kravde også erstatning, men fekk her ikkje medhald av retten, som trudde på seljarane når dei forklarte at dei var ukjende med at det var rotter i huset.
