I helga er det klart for både Makrell- og Pirfestival i Fosnavåg.
Endret: 02.09.2010 kl. 17:51
Folk i Fosnavåg får både i pose og sekk når det vert arrangert festival i helga: Makrellfestival for dei vaksne og Pirfestival for ungdomen.
Allereie fredag startar Makrellfestivalen med fiskerikonferanse og hyggekveld på kaia - før det går slag i slag heile laurdagen med maritim messe, spennande fiskeretter - og sjølvsagd - musikk og moro.
Men dei som er på jakt etter tivoli og hurtigmat vert truleg skuffa:
- Vi har fokus på fisken som mat, tradisjon og kultur, fortel Karl Petter
Sortehaug som er med på arrangørsida.
6500 besøkande i fjor
Makrellfestivalen vart arrangert for første gong i fjor - og trakk om lag 6500 besøkande. I år kjem sjølvaste fiskeridirektøren for å delta på konferansen og stå for den offisielle opninga av festivalen laurdag.
I festivalteltet vert det bydd på ulike smakar frå kysten mellom anna i regi av Slow Food Sunnmøre og den anerkjende kokken Hanna Frosta. Der vert óg eige telt med maritim messe med ulike leverandørar til den maritime næringa.
- Årets festival har vorte mykje meir omfattande og vi ønskjer å gjenskape noko av den gamle marknadskjensla på kaia, held Sortehaug fram.
NM i sensorkasting, familieshow og byvandring er berre noko av det som elles står på programmet.
Hiphop og Klypa-show
Laurdag vert den store dagen for ungdomane med Pirfestival - etter den yngre utgåva av makrellen.
I Herøy kulturhus vert det underhaldning heile kvelden med Kjell «Kjellen» Bigset frå Klypa, hiphop-gruppa Robin og Bugge og dei lokale banda Coma, Blodig Alvor og Epic Noise på scena. I siste lita har óg rapparen A-Lee, som tidlegare i år var A-lista på NRK P3 med hit-en «World So Cold», vorte klar for Pirfestivalen.
Robin og Bugge tek turen opp med privatfly og vil truleg filme delar av konserten i Herøy. Nokre av desse opptaka kan ende opp i ein musikkvideo frå artistane.
Festivalen som innleiast med crosscart, paintball og volleyballturnering tidlegare på dagen er for ungdomar frå 8. klasse.
Rusfritt
Ungdomsarbeidar Mona-Grethe Ryssevik i Herøy påpeiker at det heile er eit rusfritt arrangement.
- Det vert i trygge former og vi har leigd inn profesjonelle vektarar. I fjor kom det 450 ungdomar og etter det eg hugser var det éin person vi mistenkte for å ha drukke alkohol, påpeiker ho.
Etter arrangementet vert det muleg for ungdomane å få skyss med buss heim att.
Ryssevik er full av lovord over det lokale næringslivet som har gått inn og støtta festivalen: - Betalinga vert mest symbolsk. Vi hadde aldri klart å arrangere noko slikt utan deira hjelp, avsluttar ho.
