Bergsøy sitt herrelag hadde god tru på siger, men slett forsvarsspel gjorde at Vikhammer til slutt vann 30-33.
Endret: 24.09.2011 kl. 22:57
– Vi hadde alle håpa å vinne denne kampen. Vi har trena godt i sommar, og utifrå kampen synest eg vi fortener litt betre i dag, kommenterte Bergsøy sin bestemann, Aron Kobbenes etter kampen.
Kobbenes enda på ni scoringar mot Vikhammer i opningskampen i 2.divisjon i handball, men allikevel blei det tap. Vikhammer, som slo Bergsøy i begge fjorårsoppgjera, vann til slutt 30-33.
Les fleire sportsnyheiter på smp.no
Glimrande opning
– Eg synest ikkje vi er heilt på topp i dag, og vi har meir å gå på. Vi rotar litt for mykje til tider, litt offensivt, men det er mest bakover eg synest vi blir for dårlege, nikka Kobbenes.
For etter ei glimrande opning, der heimelaget Bergsøy leia 5-1 etter seks minutt, fekk Vikhammer gå opp til 6-8 etter halvspelt første omgang. I resten av omgangen fulgte laga kvarandre tett, og bortelaget gjekk til pause med leiing 15-16.
Utvisningar
Før kampen hadde Bergsøy mål om å ikkje sleppe inn meir enn 20 baklengs, maks 25. Det såg kanskje ut til å kunne gå, for etter nærmast halvspelt andre omgang var Bergsøy i leiinga 22-20.
Det glapp derimot igjen, og unødvendige - og uheldige - utvsningar, gjorde at Vikhammer gjekk opp til 22-25. Bergsøy henta dei inn til 26-26, men deretter var det bortelaget som hadde marginane med seg. Til slutt enda det 30-33 framfor dei mange frammøtte i Herøyhallen.
– Fri bane
– Måla vi scorer skal vere nok til å vinne, men vi slepp dei for lett til i forsvar. Vi støter ikkje kjapt nok, og gir dei fri bane mot mål litt for ofte, sa ein litt skuffa Kobbenes.
– Men dette er eit lag vi skal slå i returkampen. Dei er ikkje betre enn oss, avslutta den 21 år gamle Bergsøy-playmakeren.
Les meir i papirutgåva av Sunnmørsposten måndag
