Los Caballeros vann herreklassa og Podémos kvinneklassa då det vart arrangert nattcup for 17. gong i Strandahallen sist helg.
Endret: 10.01.2012 kl. 21:03
- Mellom dei beste turneringane vi har hatt. Alt har gått knirkefritt med 32 lag i kontinuerleg spel i godt over 20 timar, seier turneringsgeneralen, Espen Hove, like etter siste finalekamp. Sjølv har han knappast hatt blund på augene for heile natta.
Jubileumssiger
Finalen i herreklassa gjekk til sudden death. Det stod 1-1 etter ordinær tid mellom hovudstadslaget, Los Caballeros, og Kappa Nova med spelarar mellom anna frå Stranda og Volda. Knut Arne Grimstad stod for målet til sunnmøringane, medan Bjørn Pickhardt og Alexander Kristoffersson scora for vinnarlaget.
- Det er tiande gongen vi er her, så det er eit lite jubileum. Og det er fjerde gongen vi vinn, fortel ein av sunnmøringane i laget, Jon André Varsi. I yngre år var han ein farleg feiar i Stranda si angrepsrekkje, men det er nokre kilo og tatoveringar sidan. Elles spela Frode Molnes og Fredrik Relling, begge med opphav frå skodjebygda, på vinnarlaget.
Kappa Nova hadde mykje av spelet i finalen, men fann ikkje ut av eit taktisk godt og lavtliggjande Los Caballeros.
-Dette er tredje gongen eg taper finalen, kunngjorde ein litt resignert Endre Kjølås etter at dommar Steinar Hjelle hadde sett sluttstrek. Prim, eit lag med gode tradisjonar i nattcupen, tok tredjeplassen etter 1-0 over Hoggorm. Målscorar her var Erik Åkre, som óg vart toppscorar i herreklassa med 13 mål
Populær heimetriumf
Stine Fivelstad vart finalehelt i dameklassa for vinnarlaget Podémos, eit lag med stamme frå Stranda IL sitt jentelag som tok Norway Cup-bronse i 2009. Desse jentene er no 17- og 18 år, og overraska positivt mot favoritt og fjorårsvinnar Puma Queens. Eit langt meir rutinert mannskap med spelarar frå FK Sykkylven, Fortuna og Volda.
Med fin teknikk, teft for mål, gode mottak og vendingar, vart det ei stor turnering for 17-åringen. Ho gjorde begge måla i 2-0 triumfen, ho vart toppscorar mellom jentene med ti mål, vart kåra til beste jentespelar og fekk sjølvsagt plass på «all-star-laget».
Team Taskedyr, stort sett med spelarar frå Brattvåg sitt damelag, tok tredjeplassen.
Chippen-konkurransen rundt midnatt, mellom uttrekte deltakarar og for fullsett hall, vart vunnen av Ole Magnus Melchior. Oppfostra i Norddal og son av Petter Melchior, tidlegare toppspelar mellom anna på Sogndal.
