I alt femten kor med til saman 430 songarar skal delta i den første korcupen som blir arrangert på Sunnmøre.
– Dette blir ei stor musikalsk oppleving både for kor og publikum. Publikum får høyre alt frå Prøysen. Madonna og Michael Jackson-låtar.
Det seier Camilla Kvalsvik Aksnes, som er leiar for Musikk- og studieutvalet i Norges Korforbund Sunnmøre. Saman med styremedlemmene Helge Viken, Lindis Utgård og Dagfinn Gundersen er ho arrangør for korcupen som laurdag fyller Scandic Parken Hotell med korsong frå morgon til kveld.
– Siktemålet er å fokusere på korsongen på Sunnmøre. Medlemmene har etterspurt meir aktivitet, og interessa for å melde seg på har vore stor. Vi håper korcupen blir tradisjon annakvart år, legg leiaren til.
Korcup etter internasjonal standard
– Kor reiser til utlandet for å konkurrere, men no kan det konkurrerast lokalt. Dommarkommentarane og poengfordeling under korcupen blir gitt etter internasjonal standard, opplyser Helge Vikan.
– Og vi er så heldige å ha fått tak i tre dyktige dommarar som har drive med kormusikk i mange år, legg styremedlemmer til og siktar til Erland Dahlen, Thomas Caplin og Charlotte Fongen.
Ulike sjangrar
Under korcupen skal det konkurrerast i sjangrane klassisk/folkemusikk, folketonar, negro spirituals/ gospel og pop/musikalar.
–Songane kora har valt å framføre viser stor bredde og seriøsitet i kora. Konkurransen er open for publikum og føregår på føremiddag og utover ettermiddagen. Då blir korsong i timevis i Bankettsalen, fortel Camilla Kvalsvik Aksnes. Formann i Aalesunds Mandsangerforening, Oddmund Olsen, blir konferansier under korcupen.
Om kvelden blir det fest for dei deltakande kora, med premieutdeling og framføring av Les Misérables med Prosjektkoret og solistane Stine Hole Ulla og Magne Fremmerlid.