Sjå musikkvideo:

Slepp fleire klangar

Lyriske melodiar og improviserte klangar. Stian Omenås Ensemble har eit stort tonespenn på si nye plate «Klangkammer 2».

– Den nye plata er ei vidareføring av den første

Stian Omenås
Kultur

– Moderne klangleg jazz med tydeleg improvisasjon. Halvparten av låtane er komposisjonar eg og dei andre musikarane improviserer rundt. Resten er opne improvisasjonar som vart til under plateinnspelinga i Holmenkollen Kapell.

Slik forklarer trompetisten og komponisten frå Valldal kva den nye plata hans inneheld.

Vidareføring

Klangkammer: Stian Omenås Ensemble er klar med ny plate. Her er musikarane fotografert i Holmenkollen Kapell der innspelinga vart gjort. Frå venstre: Rob Waring, Stian Omenås, Erik Nylander og Mats Eilertsen. Foto: Thomas Hukkelberg 

For tre år sidan gav Stian Omenås Ensemble ut si første plate «Klangkammer 1», der musikarane boltra seg med klangar og rytmar.

– Den nye plata er ei vidareføring av den første, fortel komponisten om «Klangkammer 2» som er ein musikalsk balansegang og leiken utforsking mellom skiftande rytme, lyriske melodiar og abstrakte tonar.

– Nokre av komposisjonane er korte og konsise låtar, medan andre er lange, dvelande og utviklar seg over tid, fortel Omenås og legg til:

– Dei fleste låtane har eg skrive til denne plata, medan andre komposisjonar har eg hatt liggande ei stund i påvente av at dei kunne passe til eit av bandprosjekta mine, fortel Omenås som i tillegg til «Klangkammer 2» no i 2016 er aktuell med ny plateinnspeling av hans komposisjonar med bandet Parallax, og skal på turne saman med felespelar Anne Hytta.

Gjer som fleire enn 24.000 andre - like smp.no på Facebook

Plateslepp

Men no først er det «Klangkammer 2» det gjeld. Innspelinga skjedde i Holmenkollen Kapell i mai 2014, og fredag 22. januar blir det plateslepp i konsertlokalet Arena i Moss, og lansering av plata på nett og i butikk.

Dagen etter er ensemblet tilbake i kapellet der plateinnspelinga skjedde, før turneen går vidare til Bergen og Trondheim.

– Eg hadde lyst til å kome til Sunnmøre på denne turneen, og har prøvd å få til konsert i Kube, og i regi av Jazzsirkelen, men det klaffa diverre ikkje med våre og arrangørane sine planar denne gongen, fortel Omenås.

Val av konsert- og innspelingslokale er ikkje tilfeldig for Stian Omenås og hans musikarar. Å jobbe akustiske i klangfulle, mindre rom inspirerer dei. Difor kallar dei musikken sin klangkammer.

Les fleire kulturnyheiter