Den populære bokbåten startar haustsesongen i Herøy 28. september. Rutenplanen viser at båten så drar innover fjordane før den set kursen nordover til Haram.
Etter ein tur til Romsdal og Nordmøre, kjem «Epos» sørover igjen til Vestnes og Sandøy før den avsluttar sesongen på Alnes i Giske 31. oktober.
– Vi har kulturprogram på dei fleste stoppa, som passar til både barnehageborn, litt større skoleborn og familiar. Bokbåten er eit unikt tilbod til mange små stadar i Møre og Romsdal, seier fylkeskultursjef Heidi-Iren Wedlog Olsen til mrfylke.no.
Ruteplan haust 2016
Dette er ruteplanen som fylkeskommunen har publisert for bokbåten denne hausten:
Onsdag 28.9: Stokksund, Moltustranda, Kvalsund
Torsdag 29.9 Gjerdsvika, Gursken, Rovde
Fredag 30.9 Kvamsøy, Fiskå, Slagnes
Laurdag 1.10 Sør-Brandal, Sandshamn, Velsvik
Søndag 2.10: Eiksund, Lauvstad
Måndag 3.10 Haddal, Leikong, Dravlaus
Tysdag 4.10 Austefjord, Folkestad, Barstadvik
Onsdag 5.10 Vartdal, Hjørungavåg, Ramstaddal
Torsdag 6.10 Hundeidvik, Sæbø, Bjørke
Måndag 17.10 Grytastranda, Tennfjord, Vestrefjord
Fredag 28.10 Tomrefjord, Fiksdal, Heggdalsvik
Laurdag 29.10 Raknes, Orten, Steinshamn
Søndag 30.10 Søre Midøy, Longva, Austnes
Måndag 31.10 Kjerstad, Søvik, Alnes
Båten har både litteratur- og kulturtilbod om bord. Så langt fylkesbiblioteksjef Annette Elin Koch kjenner til, er båten heilt unik i verdssamanheng.
I fjor vart det lånt ut 11.000 bøker og andre media til 5.500 besøkande barn, ifølgje Koch.
Kultur om bord
På sørturen er Per Jostein Aarsand med. Han begeistrar publikum med historia om verdas snillaste og gatas sterkaste hund, Rocky. I 2013 vart han nominert til Gullsekken for beste skuleførestilling.
På nordturen er Astrid Elise Sæterøy med. Ho tar barna med på ein leiken halvtime med Bolletjuven og andre eventyr. Astrid er utdanna skodespelar ved Nordic Black Theater og Høyskolen i Oslo, og har turnert i Den kulturelle skolesekken med mange ulike framsyningar.
Båten blir drifta i samarbeid med Hordaland fylkeskommune.