I ein ny episode av podkasten Sunnmørsfolk møter du artisten Lizz, eller Lisbeth Brekke Sylthe, frå Kvamsøya i Sande.   Foto: Staale Wattø

Podkasten Sunnmørsfolk:

Fortel ærleg om depresjon i annleisåret 2020

I juni vann ho Musikkprisen og seier det er noko av det beste som har skjedd henne. Men 2020 har likevel vore eit vanskeleg år for artisten Lizz.

– Eg har vore deprimert til tider. Sjølv om eg fokuserer på alt det gode som har skjedd dette året, har eg likevel hatt eit vanskeleg år. Økonomisk har det ikkje vore bra, og eg er ikkje lenger den sprudlande og glade personen som eg eigentleg vil vere.

Ho er open, Lisabeth Brekke Sylthe, eller Lizz, som mange kjenner ho som. I midten av juni vann artisten Musikkprisen og plateinnspeling i Ocean Sound Recordings. Denne hendinga omtalar Lizz som noko av det beste som har skjedd henne.

Høyr vekas episode av Sunnmørsfolk med Lizz i gjestestolen:




2020 var året då alt skulle skje, men i staden hagla kanselleringane inn. Det har knapt vore jobbar å oppdrive for artisten som hadde avtaleboka full. Koronatida har, mildt sagt, vore utfordrande:

– Eg har gjeld. I tillegg har eg heldt meg meir inne. Er ikkje så mykje ute blant folk lenger, og det saknar eg, nærleik til folk.


Strøymekonsert med Lizz:

– Endeleg blir det konsert igjen

Ho hadde våren planlagt og timebøkene fulle, Lizz. Så kom koronaviruset.


– Kvifor skal eg ikkje berre seie det som det er? Sanninga er at eg ikkje har hatt det så greitt i år, fortel Lizz.   Foto: Staale Wattø

Krevjande

Lizz støttar alle koronatiltaka fullt ut, men seier:

– Det som ikkje har fungert så godt er systemet for dei som ikkje har jobb lenger. Det er så mykje du må kunne som sjølvstendig næringsdrivande, og det finst ingen som fortel deg kva du har rett på.

Å vere kulturarbeidar og artist krev også at ein har kontroll på rekneskap og tal. Det er slikt som Lizz merkar at ho må lære seg meir om.   Foto: Staale Wattø.

I denne krevjande situasjonen er Lizz glad for at ho har fått eit vikariat innan kulturskulen på Hareid. Det er utruleg kjekt, fortel ho.

– Eg har lært mykje av det musikalsk, sjølv også. For innan kulturskulen er notar viktig. Eg er ein slik som alltid har spelt på gehør.


– De har skapt magi i lag. Mye mer enn vi vågde tro i forkant

Musikkvideoen Optimist roses både av Sparebanken Møre som har finansiert den, men også av flere av de som har bidratt til den. Se videoen her!


Ein draum

Å vere ute blant elevar på kulturskulen, og å ha ein jobb å gå til, har vore bra for Lizz nett no. Ho ser sjølv at ho har mykje å vere takksam for, som ein god kjæraste, at ho vann Musikkprisen, at ho har plateinnspeling på vent hos Ocean Sound Recordings. Og så kan det hende at dei tunge tankane resulterer i noko bra musikalsk også.

– Dette året har eg skrive eit par låtar som handlar om det at eg ikkje har hatt det så greitt, at eg har vore nedfor. Dei to låtane har eg eit mål om at skal bli ferdige i år.

Korleis er reisa frå å vere trubadur til å bli seriøs artist? Dette pratar Lizz om i podkasten Sunnmørsfolk.   Foto: Staale Wattø

Ho har i det heile utvikla seg som artist dette året, sjølv om det er ei utvikling som byrja lenge før.

– Stemma mi har forandra seg markant etter at eg flytta heim til Kvamsøya frå Trondheim. Ute på øya kan eg synge så høgt eg vil utan å forstyrre nokon.

I podkasten Sunnmørsfolk fortel Lizz meir om alt dette. Ho fortel om det å bu på Kvamsøya, kva det gjer med henne, om å vere skeiv på ein liten stad, om å finne talentet sitt og om annleisåret 2020. Dessutan fortel ho om kjærasten, korleis dei fann kvarandre, og at kjærasten søv når Lizz jobbar – for det skjer ofte midt på natta. Også får du vite kvifor Lizz heiter Lisabeth. Det har noko med ein sko å gjere. I tillegg snakkar om ho korleis det er å gå frå å vere ein trubadur til å bli ein seriøs artist.

– Mange seier til meg at eg verkeleg har valt den harde vegen. Eg byrjar å skjøne kva dei meiner. Men eg har ein stor draum om å kunne leve av musikken, og eg gir meg ikkje.


Helgapraten med Lisabeth Brekke Sylthe:

– Eg byrja å grine, og klarte ikkje å prate. Då sa mamma «eg trur det Lisabeth har lyst til å seie er at ho likar jenter betre enn gutar»

Musikaren har hjarterom for den enkelte, ei enorm omsorg for menneske og dyr og eit smil som strekk seg frå øyre til øyre. Men bak fasaden du ser på scena, skjuler det seg fleire historier om «Lizz».