Noreg er eit av dei tryggaste landa i verda å føde i. Sjølv om fødselsomsorga vår er i verdstoppen, held vi fram arbeidet med å gjere ho endå tryggare og betre – i heile landet. Vi vil ha eit fødetilbod som består at dei små fødestovene, dei mellomstore fødeavdelingane og dei store kvinneklinikkane.
55 000 kvinner føder born i Noreg kvart einaste år. Dei aller fleste kjenner seg trygge, og vert godt tekne vare på av flinke fagfolk før, under og etter fødselen. Det har aldri vore tryggare å føde i Noreg enn det er i dag. Spedbarnsdødelegheita har aldri vore lågare. Talet på kvinner og born som vert skadde under fødsel, har aldri vore lågare. Kvinner er meir nøgde med fødetilbodet på sjukehusa enn tidlegare.
– Ørsta kommune sitt tilbod til gravide og fødande går på sparebluss
Det er behov for fleire jordmødrer i kommunane. Difor har regjeringa lagt til rette for nær ei dobling av talet på jordmorårsverk i kommunane sidan vi tok over. I 2013 var det 279 jordmorårsverk i kommunane, medan det innan utgangen av 2019 vil vere om lag 540. Fordi talet på fødslar har gått ned i same periode, har talet på gravide per jordmor gått kraftig ned.
– Å bruke tal frå eit enkelt år blir ikkje rett, det er misbruk av statistikk
Regjeringa har i tillegg lovfesta at frå 1. januar 2020 skal alle kommunar ha jordmorkompetanse. Dette kravet vart i si tid fjerna av den raudgrøne regjeringa, og no gjeninnført mot Arbeidarpartiet sine røyster. Å lovfeste kravet om jordmor styrker rettane til kvinna, og det er beklageleg at Arbeidarpartiet gjentekne gonger har synt at dei ikkje stør opp om dette kravet.
Fødselsomsorga i Noreg er veldig god, men ikkje perfekt. Høgre held difor fram arbeidet med å gjere ho endå tryggare og betre. Det skal vere trygt å føde, uansett kvar ein bur.
-------------------------------------------
Har du noe på hjertet? Send innlegget ditt til debatt@smp.no.