I det siste har vi hatt mange innlegg om demokrati, toleranse m.m. i Sunnmørsposten. Eg vil svare JA på at Noreg er eit tolerant land å vekse opp i, så lenge eg meiner det andre vil eg skal meine. Har du derimot andre meiningar, er nok toleransen langt vekke.

Du må godta det som vert servert av staten gjennom media. Kjem du med kritiske merknader vert du stempla som ein original (tulling- konspirator). I så fall er eg i godt selskap. For den som kjenner bibelsoga, så er Noa den første originalen eg veit om. Tenk å bygge ein 180 meter lang båt langt inne på land. Han brukte nesten 200 år på å bygge denne båten. Kor mange tilrop han måtte tole står der ingenting om, men han vart berga frå flaumen. Difor vil eg ikkje teie, men prøve å få fram sanninga.

Noreg er på full fart mot ein sosialistisk stat. No har vi fått ei ny regjering som vil redusere støtte til barnehagar som ikkje er kommunale. Dei gjer det under påskot av at dei private tek ut utbytte frå drifta av barnehagen i staden for å bruke pengane til barnas beste. Sanninga er den at mange av dei private barnehagane er drivne av kristne organisasjonar. Her får dei høyre at vi er skapt til mann og kvinne og takkar Gud for maten. Dette er ikkje like greitt for alle.

Difor må dei styrande i landet få dette bort. I samsvar med FNs barnekonvensjon skal foreldre ha valmoglegheiter til utdanning for borna sine. Dette vert vanskelegare når staten skal stå for drift av barnehagar og skular. Likeins vil dei stoppe etablering av nye privatdrivne skular. Kvifor? Fordi mange av dei private skulane er drivne av kristne organisasjonar. Her får dei høyre evangeliet kvar dag og det er ikkje bra for sosialismen som ikkje vil ha noko med dette å gjere. Dei vil og redusere skattefrådraget som vi i dag får ved å gi gåve til lag og organisasjonar.

Dette forsvarer dei med at det er til fordel for dei rike. Ei stor løgn. Dei vil at lag og organisasjonar skal søke om driftsstøtte. Då kan dei sile ut dei som ikkje skal få. Ein grei måte å ha kontroll på. På denne måten tek dei frå lag og organisasjonar ein stor del av dei årlege inntektene desse laga har. (Du som gjev til kristne lag, ikkje reduser gåva di sjølv om du ikkje får skattefrådrag).

Johan Per Sunde

-------------------------------------------

Har du noko på hjartet? Send eit innlegg til meninger@smp.no.

Her finn du alt meiningsstoffet på smp.no!