Høgre har blødd lenge, både i Møre og Romsdal og nasjonalt. Det er Høgre sitt største problem fem dagar før valet. No er det ikkje lenger nok å stoppe blødinga.
Det tar meir tid å snu ein tung, negativ trend enn å sløkkje ein liten brann.
Slik blir Mørebenken
Når stemmene blir talde opp mandag kveld, tyder derfor alt no på at Mørebenken blir slik:
Per Vidar Kjølmoen og Åse Kristin Ask Bakke (Ap)
Jenny Klinge og Geir Inge Lien (Sp)
Sylvi Listhaug og Frank Sve (Frp)
Helge Orten (H)
eitt utjamningsmandat.
Vinnaren målt mot 2017-valet blir altså Senterpartiet. Senterpartiet går mindre tilbake i Møre og Romsdal enn nasjonalt, og er i ferd med å gjere sitt beste val sidan 1993.
Det var sist gong partiet hadde to på Stortinget frå Møre og Romsdal.
At partiet har falle frå målingar godt oppe på 20-talet tidlegare i år, rokkar ikkje ved det. Fallet gir seg heller ikkje utslag i tap av mandat.
Taparen blir Høgre som går frå tre til eitt mandat.
Sterk lojalitet for KrF
Beste formkurven er det likevel Frp som står for – og KrF.
KrF-veljarane sluttar opp om eit parti i krise. Ingen andre parti i fylket har ein så sterk lojalitet frå tidlegare veljarar.
Dei ser ut til å leggje andre saker og preferansar til side, og ser dette som det skjebnevalet det er.
Framleis er likevel toppkandidat Harry Valderhaug heilt avhengig av både flaks og at KrF-veljarar i heile landet tenkjer det same.
Sjølv om KrF skulle gjere eit betre val enn sist i Møre og Romsdal, er det sperregrensa sin magi som avgjer.
Frp i tet
I heile år har Frp og partiet sin andrekandidat, Frank Sve, kome stadig tettare på hovudfeltet. I denne målinga rykker han forbi, og inntar tetplassen. Ein langvarig kamp i det som har vorte dei lokale hovudsakene i valkampen, kampen mot Møreaksen og bompengar, har gitt resultat.
I tillegg ser partiet ut til endeleg å ha klart å hente ut ein viss Sylvi-effekt. Partiet er i framgang på nasjonale målingar, og gjorde eit brakval i skulevalet denne veka.
Å vere omgitt av positive nyheiter og breie glis er gull verdt i innspurten av ein valkamp.
Då betyr det mindre at dagens måling ville gitt det svakaste valresultatet sidan 2001.
Høgre heng i myra
For Høgre er det stikk motsett.
Nesten alt partiet tar i blir gråstein. Inga enkeltsak har klart å glitre.
Og målingane både lokalt og nasjonalt heng som eit stadig tyngre blylodd på Erna Solberg.
Slike blylodd er vonde å ha på beina når ein har gått seg fast i ei myr av dårlege nyheiter og dårleg stemning.
Inga enkeltsak kan snu dette. Ikkje ein gong ein raud-grøn tabbe.
Blodtapet over tid er for stort.
Kreftene er borte. Tida er ute.