Møreaksen er eitt steg nærare realisering. Samferdselsminister Jon-Ivar Nygård (Ap) slår dette fast etter å ha vurdert den siste utgreiinga for alternativa for kryssing av Romsdalsfjorden.

Med dette stadfestar også Ap-Sp-regjeringa trasévalet Høgre-Frp-regjeringa tok i 2014.

Nygård er no den fjerde samferdselsministeren som har halde fast på dette. Debatten lokalt er likevel neppe slutt, men sjansane for ei heilomvending til fordel for Romsdalsaksen er likevel minimale.

Debatten om kryssing av Romsdalsfjorden er stadig like kjenslefull i Møre og Romsdal. Meiningsmålingar har synt at folket er delt mellom dei tre alternativa Møreaksen, Romsdalsaksen og vidare ferjedrift.

Konklusjonen til statsråden baserer seg på den hittil siste tilleggsutgreiinga.

Der kjem Møreaksen betre ut enn Romsdalsaksen både på trafikantnytte, reisetid Ålesund-Molde, netto nytte bu- og arbeidsmarknad og samfunnsnytte når sambandet til Aukra er med.

Romsdalsaksen gir kortare reisetid mellom Sunnmøre og Nordmøre, betre CO₂-rekneskap og kan også bli litt rimelegare. Feilmarginane i kostnadsprognosen er derimot større.

Det er altså pluss og minus med begge alternativ, men totalt kjem Møreaksen best ut. Med statsråden sin klare konklusjon om dette, ligg det meste klart for full anleggsstart om rundt to år frå no.

Eit stort fleirtal i Stortinget stilte seg også bak dette då Nasjonal Transportplan (NTP) vart vedtatt i fjor vår.

Partia som der var for Møreaksen, har i dag 123 representantar i Stortinget. Rødt, SV, MDG og Frp røysta imot. Dei har i dag 45 på Stortinget. Den politiske kjøtvekta talar altså også klart i fordel av Møreaksen.

Neste steg er ei siste kvalitetssikring (KS2). Så vil Stortinget få saka tilbake, først som ein bompengeproposisjon våren 2023. Rundt fire milliardar av kostnadane er tenkt finansiert med bompengar.

Med eit ja her kan mindre, førebuande arbeid startast.

Før full anleggsdrift må derimot dei store pengane på bordet. Om bompengeproposisjonen blir vedtatt våren 2023, kan det først skje i budsjettet for 2024. Full anleggsdrift kan det då tidlegast bli frå 2024.

Ingen ting er heilt i boks før pengane er løyvd og spaden er sett i jorda. Fram til det skjer er det framleis rom å kjempe for andre alternativ for fjordkryssing.

Det er ein heilt legitim rett å gjere det.

Vidare omkampar vil likevel mest truleg anten verte resultatlause eller føre til at fjordkryssinga blir utsett og pengane brukt andre stadar enn i Møre og Romsdal.