Etter NRK Debatten den 17.01 har ikkje reaksjonane etter utspela til sentralstyremedlem i Raudt, Joakim Møllersen latt vente på seg.

For fult alvor, til mange si vantru, meiner Møllersen frå Raudt at Noreg ikkje skal støtte Ukraina med våpen. At å støtte Ukraina med våpen til å forsvare seg mot Russland sin uprovoserte invasjon, er å forlenge krigen og føre til unødig liding.

Det er først no, etter sterke reaksjonar, at partiet kanskje er i ferd med å snu. Men utspela vi fekk servert på Debatten bekreftar jo berre den vedtatte politikken til Raudt, som konsekvent har vore mot våpenstøtte til Ukraina. Det burde faktisk ikkje kome som ein overrasking i det heile, at Raudt har dette standpunktet, for dei har hatt det heilt sidan krigen braut ut for snart eit år sidan. Det blir litt merkeleg å sjå partiet gjere ein heilomvending av dei sjeldne. Eg kan godt forstå engasjementet til Raudt: Å unngå eskalering av konfliktar. Men vi er nøydde til å ta innover oss den grufulle realiteten i Ukrainakrigen.

Både Raudt og andre som er mot våpenhjelp, meiner Ukraina skal forhandle med eit regime der sivile ukrainarar blir utsett for valdtekt tortur og drap i russiskokkuperte område. Lite tyder på at Russland vil trekke seg fredfullt ut av Ukraina og erkjenne nederlag. Skulle Ukraina berre lagt seg på rygg og vifta det kvite flagget og håpe på at brutaliteten tek slutt? Naivt er ein kraftig underdriving.

For Russland vil ikkje trekkje seg ut av dei okkuperte områda i Luhansk, Donetsk, Zaporizjzja, og Kherson. Og heller ikkje Krym. Store landområde aust for elva Dnipro er blant dei mest produktive dyrka areala for kornproduksjon. Å la Russland få kontroll over desse områda vil gi Putin enda eit maktmiddel å true og presse med. Mogelegheita til å påverke tilgang og pris på korn. Dette er ikkje noko lurt for å seie det mildt.

Den praktiske konsekvensen av å nekte våpenhjelp til Ukraina er ikkje raskare fred, men raskare nederlag for eit sjølvstendig Ukraina. Konsekvensen blir derimot at Ukraina som fritt land kan bli bortimot utradert. «Kartet» som Dmitry Medvevev viste fram, viser kva ambisjonar Russland har for Ukraina.

Eg glad for at KrF støttar heilhjarta opp for våpenhjelp til Ukraina heilt sidan krigen starta. Og regjeringa skal få ros, for at dei sender Ukraina utstyr (Enn om ein litt treig start) til å forsvare sin fridom.

Partiet avslørar seg sjølve i den heilomvendinga dei no står i først når vinden snudde mot dei. Bjørnar Moxnes vil ikkje endre standpunkt (kva no enn det er?) først til landsmøtet i april. Men betre seint enn aldri?