Fylkesleiar i Møre og Romsdal SV, Bjørn Jacobsen, avsluttar sitt lesarinnlegg i Sunnmørsposten 20.2 om krigen i Ukraina slik: «Vi bør alle klare å rive oss laus frå idefattigdommen, og få opp alle kreative forslag som kan stoppe krigen.» Han saknar kreative forslag til våpenkvile og forhandlingar frå partileiinga i sitt eige parti, og han saknar kreative forslag frå forskarar. Han snakkar både til seg sjølv og omverda. Vedtaka om å sende meir våpen, kallar han «fattigslege.»

Kan du sjølv komme med «kreative forslag», Jacobsen? Du er fylkesleiar i eit politisk parti med ambisjonar, og du har argumentert mot våpenhjelp. Då burde du også vere kreativ nok til å peike på ein veg mot våpenkvile og forhandlingar. Du må då sjølvsagt ha i tankane at Putin meiner Ukraina eigentleg ikkje har rett til å vere ein sjølvstendig nasjon. Putin ser på Ukraina som ein amerikansk koloni med eit marionettregime. Han skuldar vesten for å ha starta krigen.

Skal Ukraina gi frå seg Donetsk og Luhansk, eller kanskje Krim? Er det kreativt? Skal Volodymyr Zelenskyj gi frå seg makta på ein måte som Russland kan akseptere? Skal Ukraina love å aldri bli med i EU og NATO?

Du roper i skogen, Jacobsen: «Stopp krigen, ikkje kreativiteten!» Og kva blir svaret?

I beste fall høyrer du ekkoet.