FAU ved Harøy skule er sterkt uroa over utviklinga ved skulen vår. Om vi som samfunn ikkje maktar å gje borna våre ein god start i barnehage og skulen, vil det få konsekvensar seinare i livet. Manglande ressursar til å følgje opp elevar, manglande samarbeid mellom ulike offentleg instansar og manglande ressursar til førebyggande innsats på tidleg stadium vil medføre utanforskap, og ein langt kortare veg til å hamne i ein situasjon der hjelpebehovet er langt større seinare i livet.
Skulen er den viktigaste arenaen for våre borns utvikling, og det er her grunnlaget for framtida vert lagt. Skal våre unge håpefulle verte i stand til å rette våre feilgrep i framtida, må vi gje dei den utdanninga og grunnlaget dei treng. Med den utviklinga vi ser i skulen, går det utvilsamt feil veg. Harøy skule har hatt fleire budsjettkutt, og skal inneverande år ned med ytterlegare 5 stillingar i skule og SFO. Barnetalet i vår skulekrins har diverre gått ned siste åra, og vi er sjølvsagt innforstått med at vi treng færre ressursar når vi har færre born i skulen, og vi er utvilsamt budd på å ta vår del av den økonomiske omstillinga som trengst i den nye kommunen.
Men med dei kutta som ligg føre no, vil det etter vårt syn ikkje lengre vere tilstrekkelege ressursar til å følgje opp alle elevane på ein forsvarleg måte. Harøy skule har særleg sårbare elevar med særskilde behov. Med færre ressursar i skulen får desse ei dårlegare oppfølging og mindre støtte til å meistre sine utfordringar. Dette får sjølvsagt konsekvensar for utviklinga til den einskilde elev, og også klassen sitt samla læringsutbytte. Klassar vil bli slått saman, og det blir langt større elevgrupper pr. lærar.
– Det har vore tunge stunder for både ledelsen og ansatte
Skulen er viktig for lokalsamfunnet. Skal denne kommunedelen vere attraktiv for busetting, og skal bedriftene våre klare å rekruttere kompetent arbeidskraft, må det vere plass til borna deira i skule og barnehage. Om kommunen endar opp med å seie opp lærarar, er det også familiefolk med born i skulen og barnehagen. Om desse endar opp med å måtte flytte, bidreg kommunen til den vonde spiralen, og ytterlegare fråflytting. Det er svært få alternative arbeidsplassar for ein lærer i vår kommunedel, og avstandane til alternative arbeidsplassar er så stor at det ikkje er mogleg om ein må hente i barnehage og SFO. Det kan ikkje vere meininga at alle skal flytte til sentrale strok, men med ei ytterlegare rasering i offentlege tilbod, vert det stadig færre argument for å verte buande. For dei fleste er den fantastiske naturen, friske lufta, flotte idrettsanlegg, den gode plassen og låge bu-utgifter gode argument for å bu her. Men skal ein halde på barnefamiliane, må dei ha eitt forsvarleg tilbod.
Vi vil derfor rope eit høgt varsku om den utviklinga vi ser, og vi ber innstendig om at kommunen skånar skulen vår for ytterlegare kutt, og at våre born ikkje vert ytterlegare råka. Vi oppfordrar både administrasjonen og kommunestyret til ta eit heilskapleg omsyn til Harøy-samfunnet, og i langt større grad ta i bruk alle dei moglegheitene som finst her ute, framfor å øydelegge for framtidige generasjonar.
-------------------------------------------
Har du noko på hjartet? Send eit innlegg til meninger@smp.no.